Advertisements

Minister Jesus Leito ta kontinuá ku esfuersonan pa modernisá nos infrastruktura

Minister Jesus Leito ta kontinuá ku esfuersonan pa modernisá nos infrastruktura

Willemstad – Minister Zita Jesus-Leito, komo e titular di e Ministerio di Tráfiko, Transporte i Planifikashon Urbano (VVRP), ta partisipá komo orador invitá na e kongreso internashonal di ingeniero sivil mundial, Global Engineering Congress, for di 22 te ku 26 di òktober. E kongreso ta tuma lugá na London, Inglatera.

Den e kuadro aki, djamars mèrdia Minister Jesus-Leito a hasi un bishita di trabou serka e presidente di e institushon ingles di ingenieronan sivil profesor sr. Lord Robert Mair, e vise presidente internashonal sr. Chai-kwong Mak, i sr. Nick Baveystock, direktor general di e institushon. E institushon aki ‘Institution of Civil Engineers’ (ICE), huntu ku ‘World Federation of Engineering Organisation’ (WFEO), ta e anfitrion di e kongreso aki.

Durante e enkuentro aki Minister Jesus-Leito a papia ku e instituto tokante aspektonan di maneho, realisashon i finansiamentu di proyektonan pa atendé ku awa di kloaka,  okupashon ilegal di tereno, bibienda, i transporte públiko.

Global Engineering Congress ta un konferensha internashonal ku partisipashon e aña aki di mas ku 2000 ingeniero i otro personanan responsabel pa maneho di infrastruktura den nan pais. Tópiko prinsipal di e kongreso di e aña aki ta e nesesidat urgente pa tuma akshon en konekshon ku kambio di klima i implementashon di metanan stratégiko sostenibel (SDG) akordá den e Agènda 2030 di Nashonnan Uní.

Den esaki e ròl di ingenieronan ta di sumo importansha pa mehorá bida di miónes di hende na mundu, espesialmente kaminda tin skarsedat di awa portable, bibienda i eradikashon di pobresa.

Minister Jesus-Leito ta keda kompañá durante di e kongreso pa sr. ir Dwigno Puriel, Sekretario General di VVRP, i sr. drs. Wilfred Muller di e kantor di UNOPS na Kòrsou.

 

Advertisements
%d bloggers like this: