Advertisements

Global Entrepreneurship Week 2018 den lus di tuma akshon pa logra felisidat duradero

 

Global Entrepreneurship Week 2018 den lus di tuma akshon pa logra felisidat duradero

WILLEMSTAD – Djaluna atardi a tuma lugá un rueda di prensa pa durante kua e board di Global Entrepreneurship Week i representantenan di organisashonnan partner a informa di e aktividatnan ku tin den tapara p’e ‘siman empresarial’ pa 2018.

Ya pa algun luna kaba preparashon intensivo ta tuma lugá pa Global Entrepreneurship Week Curaçao 2018 (GEW Curacao) bira ainda mas grandi di loke tabata e tres añanan anterior. E trabounan di preparashon no ta solamente den e ‘board’ responsabel pa GEW Curaçao, pero tambe serka diferente otro organisashon partner di GEW Curaçao kual tin e desaroyo di mundu empresarial i felisidat duradero pa nos komunidat na pechu.

E aña aki e selebrashon di ‘Global Entrepreneurship Week’ ta tuma lugá di 12 pa 18 di Novèmber na hopi pais den tur skina di mundu. Tema pa aña 2018 pa Kòrsou ta; ‘Entrepreneurship, Money & Happiness’. E slogan ta ‘Action Towards Satisfaction’.

Na 2014 Global Entrepreneurship Network, e organisashon mama, a otorgá lisensia na Fundashon Negoshi Pikiña (FnP) pa promové e ‘siman empresarial’ na islanan di Karibe Hulandes. Na 2015 FnP ta organisá e promé GEW na Kòrsou. Pa e aña siguiente Boneiru tambe a organisá su promé Global Entrepreneurship Week.

Algun aña pasá algun empresario sumamente eksitoso riba nivel mundial a lanta Global Entrepreneurship Network (GEN) ku e meta pa stimulá mas initaitiva di negoshi ku konsekuentemente mester perkurá pa mas kupo di trabou. E organisashon GEN den djis algun aña a logra un kresementu remarkable di afiliashon i na 2018 ta konta ku 170 pais miembro.

E vishon tras di e ‘siman empresarial’ ta pa promové aktividat i eventonan pa stimulá entrepreneurship. Alabes GEN ta promové pa tene enkuentronan durante kua start-ups i scale-ups por interkambiá di idea i empoderá otro por enfrentá retonan di e mundu di negoshi.

Despues ku den e añanan inisial e ‘board’ di GEW Curaçao a organisá mayoria evento i aktividat durante di GEW Curacao, pa asina Global Entrepreneurship Week bira konosí riba nos islanan, ya aña pasá, i sigur e aña aki, ta tuma nota ku mas i mas organisashon ta partner ku GEW Curaçao, pa organisá nan evento(nan) durante di e ‘siman empresarial’. Kada unu for di nan propio initiativa, pero aliniá ku e vishon di ‘Global Entrepreneurship Week’.

Otro desaroyo interesante ta ku organisashonnan internashonal ta uní ku mundu empresarial di nos islanan durante di Global Entrepreneurship Week pa asina estrechá lasonan, interkambiá konosementu i hasi ehersisionan pa stimulá pa hasi negoshi huntu. Por hasi menshon di e organisashon Women Entrepreneurs Netherlands ku ta bini ku un delegashon di empresarionan di Hulanda pa duna presentashon i network ku empresarionan di Korsou. Alabes por informá di organisashonnan di Aruba, Boneiru i Colombia ku ta uni ku empresanan di Korsou pa e interesante Sustainable Trade Expo organisa pa e organisashon ‘I Am Made Curacao’ ku ta partner pa di tres biaha konsekutivo ku Global Entrepreneurship Week Curacao.

Den e tres añanan previo na 2018, e ‘board’ di tantu Kòrsou, komo Boneiru, a logra trese empresarionan sumamente eksitoso riba nivel mundial, kende nan pa medio di charla, seminario i workshops a kompartí nan eksperensia, i duna ‘tips & tools’ na nos empresarionan.  Den mesun rosea e organisashonnan na Kòrsou i Boneiru a logra krea plataformanan pa ekspertonan lokal tambe por kompartí nan konosementu i ekspertisio. “E aña aki esei no ta un ekspenshon. “Nos ta hopi orguyoso di e logranan i desaroyo den asina poko tempu,” sra. Elgenai Pieternella, president di GEW Curacao a bisa. “Ku orguyo mi por bisa ku nos a risibí rekonosementu i menshon positivo den publikashonnan internashonal di GEN pa aktividatnan realisá na tantu Kòrsou, komo Boneiru. Esei no ta nifiká ku nos por lèn patras, pero mester purba kontinuamente na mehorá e prestashon di añanan anterior. I ora mi ta menshoná ‘nos’ mi no kier men e ‘board’ di GEW Curaçao, pero tur organisashon ku tin desaroyo di sektor empresarial di nos islanan na pechu i a partner di un forma of otro ku GEW Curacao.”

“Nos islanan i hopi pais na mundu ta pasando den tempu difisil komo ku tata i mamanan, kabes di famia ta pèrdè empleo. Ku empoderashon di e personan aki por logra ku nan ta tuma nan destino den propio man i kisas lanta un empresa chikí, of lanta un kompania huntu, ku despues por krese i perkurá pa nan tin un entrada i por perkura pa kuponan nobo di trabou. Pa e motibu ei nos ta hasi un yamada na tur hende ku tin un idea di negoshi òf tin un empresa kaba, pa reservá e siman di 12 pa 18 di Novèmber, pa partisipá na e evento i aktividatnan ku nos komo ‘board’ di GEW Curaçao, pero tambe otro organisashonnan ya tene e aña aki.”

Segun e dianan pa GEW Curaçao 2018 ta transkurí lo komuniká detaye di e programa ku e ‘board’ a prepara, i tambe di eventonan di partnernan. Esaki lo ta via komunikadonan, e pagina di Instagram  (gewcuracao) i Facebook di Global Entrepreneurship Curacao I e website www.gewcuracao.com. Lo informa tambe via talkshows i eventonan di networking manera TGiM i Network After Work.

 

 

Advertisements
%d bloggers like this: