Advertisements

SDKK ta organisá klinika i kompetensia di Domino pa klientenan

SDKK ta organisá klinika i kompetensia di Domino pa klientenan

Willemstad – ‘Realisando e máksimo potensial di Kòrsou’: asina aki SDKK ta buska  aliansanan positivo pa krea oportunidatnan balioso pa esnan ku ta detené den e instituto. Un biaha mas e esfuersonan inter ministerial (Ministerio di Hustisia i  Ministerio di Enseñansa, Siensia, Kultura i Deporte) a duna resultado. Un biaha mas a uni forsa pa mustra e vishon i mishon kompartí pa loke ta trata entre otro e desaroyo artístiko kultural i mental di e klientenan detené den SDKK.  

Den tur sosiedat kaminda konsientemente ta traha na edifikashon di un pueblo, diferente instrumentonan di edukashon i formashon a i ta wòrdu uzá komo fundeshi pa desaroyonan positivo i deseá. Bou di inisiativa di Tim di Maneho di SDKK a inisiá un klínika i kompetensia di dominó pa 14 departamento. Despues di e klínika, ku lo dura 2 siman kaminda e klientenan ta haña chèns pa por trein. Kada klínika lo dura kada bes 2 ora. Despues lo inisiá e parti kaminda lo pone kompetensia di 14 departamento kontra di otro, pa asina saka e kampionnan. Kada departamento lo keda representá pa 2 kliente.  

Mester bisa ku Tim di Maneho di SDKK a hasi uso di e oportunidat aki tambe pa duna elogio na nos talento lokal ku ta e gran maestro sr. Jean-Mark “Gin” Welvaart.  Sr. Welvaart ta e persona ku ta enkargá ku realisashon di e proyekto aki den SDKK. Den pasado sr. Welvaart a sa di titulá na vários okashon ‘Kampion di Kòrsou’ i tambe internashonal. Den kampionatonan mundial Sr. Welvaart kasi tur aña ta den e tòp 10 di mundu. Na aña 2012 na Valencia (Venezuela.) sr. Welvaart a yega te na e puesto number 2 di mundu. 

E klínika lo ser duná den e sistema di dominó di konta punto, òf mihó bisá “Dominó 200 tantu”. Ta hasi uso di e oportunidat aki pa siña e klientenan e diferensia entre e sistema tradishonal di hunga dominó na Kòrsou i Boneiru i esun internashonal rekonosé. Internashonalmente e manera di hunga dominó ta esun sistema di 200 tantu. 

Dos kompania lokal a hasi donashon di e sètnan di dominó ku ta wòrdu uzá durante e klínika- i kompetensianan. Ta trata aki di Distribier i Curoil. Despues di e kompetensianan e sètnan di dominó lo keda pa e 14 departamentonan. E kompetensia mes lo ser hungá riba mesanan profeshonal ku dominónan speshal. Lo bai tin 2 árbitro sertifiká pa Federashon Internashonal di Dominó, mas 1 árbitro di mesa. 

Tim di Maneho di SDKK ta di opinion ku mester duna kada siudadano, mas tantu posibel, e posibilidat pa desaroyá su talento – i abilidatnan natural.   

Un komunidat eduká, formá i ku étika (norma i balornan haltu) i empatia pa su kosiudadano ta forma un komunidat ku por bria awor i den futuro. SDKK ke ta parti di e desaroyo aki ku riba tereno di formashon ta bai pa ekselensia.  

 

Advertisements
%d bloggers like this: