Advertisements

Rekoudashon di fondo Duck Cocktail Party & Arte Patu Auction: alrededor di 20.000 florin

Rekoudashon di fondo Duck Cocktail Party & Arte Patu Auction: alrededor di 20.000 florin

Djasabra anochi  20 di òktober a tene Duck Cocktail Party & Arte Patu Auction pa di tres bia. Un fiesta úniko pa kasi 180 hende ku presentashon di Pure Muse.ic, i durante e fiesta un findishi di 17 obra di arte.  Tambe ta di tres bia ku a otorgá Anthony da Costa Gomez Award. E biaha akí a homenahiá Children’s Museum Curaçao, kaminda e fiesta a tuma lugá tambe.  E award akí ta na memoria di Anthony da Costa Gomez, un miembro hopi aktivo i kerí di Rotary Club Willemstad i tambe inisiadó di e Duck Event.

 

Stichting Encelia

E fondonan rekoudá ku e Duck Cocktail Party i tambe e Duck Race dia 4 di novèmber den Waaigat, ta destiná pa Stichting Encelia, un fundashon ku ta ofresé akohida di krísis pa muchanan entre 4 i 12 aña. Sosten finansiero ta nesesario pa por ofresé e muchanan akí un hogar sigur ora nan ta pasando tempunan difísil.

 

Obranan di Arte Patu

Tur e obranan di arte ku ta na findishi durante e evento akí tin algu di haber ku patu.  E artistanan ku a koperá ku e bon kousa akí ta: Ans Mezas, Andre Nagtegaal, Avantia Damberg, Bebette de Waele, Daphne Luttge, Delno ‘Denchi’ Tromp, Ellen Spijkstra, Giovanni Zanolino, Hanneke van de Hout-Floor, Joanne den Dulk, Giovanny Abath, Maghalie van der Bunt-George, Mirjam Griffioen, Sandra Leonnora, Shannon Solange Ray, Sinuhe Oomen i Susan Agnes Rudolf. E personanan presente a bit bon riba e obranan di arte, loke a pone ku resultado di e findishi tabata alrededor di 20.000 florin.

 

Sosten leal

Tantu e Duck Cocktail Party di djasabra anochi komo e Duck Race ta posibel ku sosten di MCB, Fundashon Bon Intenshon, CTB, CPA/KTK,Securitas i One Media. Nan sosten inkondishonal i entusiasmo ta hasi posibel pa organisá eventonan grandi asina akí pa rekoudá fondo pa e bon kousa akí. Huntu ku tur hende presente na e fiesta, kumpradónan di e obranan di arte i tambe kumprando  karchinan di Duck Race, nos ta yuda Encelia sigui ku nan trabou balioso i nesesario.

 

Duck Race 4 di novèmber

Duck Race ta un evento internashonal di Rotary pa hinter famia, kaminda vários mil patu di  baño di spònser ta drif bai e destinashon final.  Djadumingu 4 di novèmber ta tene e di tres edishon di Duck Race na Kòrsou den Waaigat. Benta di karchi pa Duck Race ta den ful swing. Pa solamente 10 florin serka Rotarianonan i na puntonan di benta konosí manera 24 Uur uit de muur, Mensing’s Caminada, Bruna, TUI-reisbureau,Van den Tweel ( Janhtiel i Zeelandia), Intertoys (Sambil & Caracasbaaiweg), Mau A Sam Travel, Oasis Coral Estate i Paletas Curaçao venues. Sigui nos riba página di Facebook di Rotary Club Willemstad.

 

Contact:

Rotary Club Willemstad

Jeanette Hooi-Bonet:     561 6156 of jeanettemhooi_bonet@hotmail.com

Bert Aegenendt:            666 4949 of bert@volease.net

 

 

 

 

Advertisements
%d bloggers like this: