Advertisements

Eksitoso di dos konferensia di integridat dediká na kombatimentu di korupshon

Eksitoso di dos konferensia di integridat dediká na kombatimentu di korupshon

Willemstad, 21 di òktober 2018 – E di dos konferensia anual organisá pa Leading with Integrity Foundation (LWI) un bia mas tabata sumamente eksitoso. Aparte di a konta ku presensia di Su Ekselensia Gobernador di Kòrsou Lucille George-Wout, Presidente di Parlamentu Sr William Millerson, promé minister Eugene Rhuggenaath i vários minister i parlamentario lokal, e aña aki e konferensia a keda presensiá tambe pa Su ekselensia Gobernador di St Maarten Eugene Holiday huntu ku representantenan di diferente kompania i servisionan di gobièrnu for di Kòrsou, Aruba, Boneiru i St Maarten. Promé minister di Aruba, Evelyn Wever-Croes ku, debí na otro kompromiso no por tabata tei presente, a manda un mensahe di video kaminda di forma elokuente el a elaborá riba e importansia ku su kabinete ta duna na integridat, su interkambio ku Minister Konket di Kòrsou riba e tema aki i alabes su sosten pa e trabou ku LWI ta hasiendo. E konferensia ku a karga komo tema ‘Beyond Self Interest a enfoká riba e importansia pa wak mas leu ku bo mes interes den kombatimentu di korupshon i e benefisionan personal ku esaki ta trese kuné.

Minister Armin Konket a hasi e apertura ofisial di e konferensia komo promé oradó. E minister a elaborá riba e importansia sosial di konfiansa pa por logra kolaborashon den un komunidat. El a para ketu na un sondeo organisá pa CBS i e similaridat ku tin entre resultadonan di e sondeo aki i e sondeo organisá resien pa LWI riba persepshon di korupshon. Finalmente minister Konket a suprayá e importansia pa kada ken kuminsá serka su mes, asumiendo responsabilidat propio pa mantené un standardo di integridat. E siguiente oradó, Nelson Foendoe, kende ta presidente di Leading with Integrity Foundation, a elaborá tokante e resultadonan di e sondeo organisá pa LWI na Mart 2018 tokante persepshon di korupshon na Kòrsou. Ademas el a splika ku ora nos  ke kombatí integridat, mester hasi esaki for di un punto di bista holístiko. Esaki ke men ku mester inkluí e diskushon tokante moralidat tambe, i no solamente enfoká riba e aspektonan ekonómiko/sosial i hurídiko. El a hasi presentashon di su buki nobo; “Becoming a Person of Integrity’ na Presidente di Parlamentu Sr William Millerson. E di tres oradó, Dr. Marlon Winedt, un filósofo i teólogo, a sigui profundisá e tema di moralidat dor di mustra kon pa yega na un norma pa moralidat. Finalmente e oradóprinsipal, Dr. Fazale ‘Fuz’ Rana for di Merka, kende ta un sientífiko, a splika kon siensia ta demostrá ku un bida íntegro tin benefisionan pa nos salú mental i físiko, spesialmente ora nos ta wak mas aleu ku solamente nos propio interes.

Durante e konferensia tabatin dos seshon interaktivo, kaminda e partisipantenan por a hasi pregunta n’e oradónan i interkambiá di opinion. Finalmente tabatin tambe oportunidat p’e partisipantenan vota riba e mésun preguntanan ku a keda presentá den e sondeo organisá pa LWI riba persepshon di korupshon i a hasi komparashon di e dos resultadonan aki.

E fundashon Leading with Integrity a risibí bon komentario tokante e konferensia i mesora a risibí invitashon pa partisipá komo oradó na konferensia pafó di Kòrsou. Leading with Integrity Foundation lo sigui ku su esfuersonan pa kumpli ku su mishon, ku ta pa ekipá lidernan den nos komunidat pa nan por inspirá esnan rondó di nan pa biba un bida íntegro. E fundashon lo keda disponibel pa sigui duna diferente ‘workshop’ i charla  tokante integridat na kompanianan i organisashonnan.

Pa mas informashon por tuma kontakto ku Leading with Integrity Foundation via email na info@lwi-foundation.org, yama na 789-3098 òf 516-9747, òf bishitá nan Facebook page: Leading with Integrity.

 

.

Advertisements
%d bloggers like this: