Advertisements

E ENFOKE MESTER TA RIBA PARA E KRIMINAL TAMBE I NÒ RIBA HERMANDAT POLISIAL SO

E ENFOKE MESTER TA RIBA PARA E KRIMINAL  TAMBE I NÒ RIBA HERMANDAT POLISIAL SO.

Kòrsou – 22 di oktober 2018

Ku asombro Partido Inovashon Nashonal (PIN) a tuma nota di e reakshon di algun polítiko i nan siguidónan, ku un biaha mas ora ku un akto kriminal tuma lugá ta purba desvia atenshon di e krimen i kriminal i mustra dede riba gobièrnu, polis i ministerio públiko. Tambe PIN a nota ku poko ta esnan ku ta konsiente ku e desafionan ekonómiko i finansiero di pais, ta eksigí eskohonan difisil. Pais por hinka tur su rekursonan finansiero skars den kombatí kriminalidat i seguridat òf sòru pa un bon enseñansa, empleo, bibienda, alimentashon i kuido médiko pa esnan ku mas mester.

PIN ta konbibí ku tur miembro di kuerpo polisial, ministerio públiko, griffier di korte, Ministerio di Hustisia i Minister di Hustisia ku a sufri un sla duru ku robo di algun shen kilo di droga for di un warda di polis. Sinembargo, mirando e grandura di e lote i e enduresimentu di kriminalnan ku no ta respetá bida di hende, ta hala rosea di alivio ku bida di kualke hende ku lo por tabata estorbo pa esnan ku a kometé e hecho a ser di spar durante e akto aki. Den un pais kaminda a asesiná un parlamentario, intentá na hinka mannan kriminal den diferente órgano di estado, korumpí algun ofisial gubernamental ku parlamentarionan kondená den funshon i ta menasá mandatarionan diariamente, siguridat ta aun mas vulnerabel. A para bira un kustumber ku aktuashon di Polis i Ministerio Públiko kontra mannan kriminal ta keda kontestá ku kritika infundá i hasimentu di politikeria kontra netamente e instanshanan aki. Den e kaso ultimo di robo for di un warda di polis di un lote di droga, mentenan shushi no a pèrdè pa gana i a kuminsa insinuá riba empleadonan di Kuerpo Polisial i pidi kabes di mando polisial, ministerio publiko i di Minister di Hustisia. Tur esei, lubidando ku ta esfuerso i bon trabou di e mesun entidatnan ei a sòru pa a konfiskâ e lote di droga ei.  Esnan ku probablemente a organisá nan mes pa kometé e akto repudiabel i burla di Hustisia, ta ser mantene kompletamente for di tur komentario i ta manera heroénan di pais pa algun polítiko opositor.

Ta bou di e sirkumstanshanan aki PIN ta pidi pueblo pa hala mara i para tras di nos aparato di Hustisia den su totalidat i pone tur mente huntu pa mas pronto posibel pone man riba e kriminalnan ku a tribi di kometé robo for di un warda di polis. PIN ta apoyá e aserkamentu di Minister di Hustisia pa keda kabes friw i laga hasi e investigashonnan nesesario interno i esun di e kaso, promé ku kuminsa mustra dede sin fundeshi. Pa PIN, e ultimo ei ta pa krea broyo i kòrtina di huma pa tapa aktonan kriminal.

 

Advertisements
error: Content is protected !!
%d bloggers like this: