Advertisements

Parlamentario Curtley Obispo: E lei di Trust di Kòrsou Titulo 6 di Buki 3 di Kódigo Sivil: su pasado, e presente i e futuro.

E lei di Trust di Kòrsou Titulo 6 di Buki 3 di Kódigo Sivil: su pasado, e presente i e futuro.

Parlamento di Kòrsou djaweps 18 òktober 2018 den un komishon sentral a trata e kambionan tékniko pa aklará mas mihó i tambe pa agregá 1 artíkulo di lei den e lei di Trust di Kòrsou. E landsverordening Trust di 15 di desèmber 2011 ku ta regarda Titulo 6 di Buki 3 di Kódigo Sivil.   Parlamentario Curtley Obispo a base di dokumentashon a mustra e pasado, e presente i e futuro pa loke ta e lei di Trust di Kòrsou. E pasado ta ku e lei di Trust di Kòrsou a drenta na vigor 1 yanüari 2012. Ku introdukshon di e lei aki e tempu ei, e meta tabata pa hasi e posishon di Pais Kòrsou su sektor finansiero internashonal mas fuerte i duna e sektor finansiero un oportunidat i un produkto nobo pa por kompetí riba nivel internashonal. Segun e memoria di aklarashon di e lei riba 11 aprel 2013, Gobièrnu di Kòrsou a risibí un karta di CIFA (Curaçao International Financial Services Association) pidiendo un kambio den lei. Tambe tabata tin un karta di CIFA fecha 14 febrüari 2014 dirigí na Parlamento di Kòrsou kaminda CIFA atrobe ta boga pa un kambio den lei pa asina eliminá diskushonnan riba e manera ku e “vermogen” di un trust di Kòrsou ta wòrdu traspasá. CIFA e tempu ei a trese dilanti ku mester eliminá e diskushonnan rondó di traspaso di “vermogen”, trese mas siguridat hurídiko pa kliente nan potensial di e sektor finansiero internashonal i sinkronisá e kambio di lei aki mas mihó posibel ku leinan di otro paisnan di Reino Hulandes.

E trayekto di lei a kana i segun dokumentonan tabata tin konsehonan di Konseho di Konsulta (Raad van Advies) dia 28 yanüari 2015 i tambe konseho di Sectordirecteur Algemene Zaken dia 4 mei 2016. Segun karta di Konseho di Konsulta di dia 29 mei 2017 tabata tin un petishon di nobo riba 26 mei 2017 pa trata e lei aki pa asina tin un konseho final pa ku e lei aki. Dia 24 ougùstùs 2017 Konseho di Konsulta a duna su konseho final.  

E presente ta indiká ku ya pa mas ku 5 aña, e lei aki ta kanando un trayekto di lei, p’esei parlamentario Curtley Obispo a pidi diferente dokumento i hasi preguntanan konkreto dirigí pa trese mas klaridat i mas informashon pa loke ta e úniko artíkulo di lei (e artíkulo 127 insiso 4) ku ta wòrdu agregá na e landsverordening Trust di 15 di desèmber 2011. Segun e kambio prinsipal di e lei di 2018, e futuro ta pa Kòrsou su sektor finansiero internashonal por tin un mihó produkto ku por ofresé i trese mas seguridat hurídiko pa potensial kliente nan di e sektor finansiero internashonal.

 

Advertisements
%d bloggers like this: