Advertisements

MINISTER MARTINA TA INOUGURA EZSHOPCURACAO.COM I INFORMÁ KOMERSIANTENAN DEN ZONA EKONÓMIKO DI DESAROYONAN

MINISTER MARTINA TA INOUGURA EZSHOPCURACAO.COM I INFORMÁ KOMERSIANTENAN DEN ZONA EKONÓMIKO DI DESAROYONAN

Willemstad-  Zona Ekonómiko di Kòrsou, manehá pa Curinde, ta dal un paso importante, ora ku minister enkargá ku Desaroyo Ekonómiko, dr. Steven Martina a hasi apertura di e plataforma di benta online, pa komersiantenan den nos zona ekonómiko por bende ku mundu.  Durante di e enkuentro e minister a duna informashon tokante avansenan den un seri di akshon pa mehorá e klima di hasi negoshi den zonanan ekonómiko manehá pa Curinde. Na mes momentu a interkambiá di idea ku e komersiantenan kendenan a hasi uso di e oportunidat pa komuniká tambe nan preokupashonnan.

Minister Martina ta inougurá EZSHOPCURACAO.COM

Ezshopcuracao.com, un inisitaiva di Curinde, ta un plataforma di e-commerce spesialmente prepará pa benta por mayor for di nos Zonanan Ekonómiko pa kualke parti di mundu. E plataforma online ta ekipá ku solushon pa hasi pago miéntras e kumpradó por reglá transporte di su merkansia for di e mesun sitio aki. Por bisa ku ta un plataforma komparabel ku Alibaba òf Amazon, pero pa benta por mayor for di nos zonanan ekonómiko.  

Presensia di e plataforma aki por yuda e kumpradó enormemente den redusí su gastu di biaha  físikamente pa Kòrsou pa hasi kompra. Di otro banda e ta fasilitá benta di e komersiantenan ya ku nan por eksponé, bende i transportá merkansianan unabes e pago ta kumpli.

Curinde di e forma aki un biaha mas ta trese inovashon al dia pa hasi komersio for di nos zonanan ekonómiko atraktivo pa e komersiante.

 

Un bista di desaroyonan

Minister Steven Martina na e okashon aki a duna un bista tambe di kon leu ta ku vários desaroyo ku e i Ministerio pa Desaroyo Ekonómiko, huntu ku Curinde i den koperashon ku tur partido relevante, ta hasiendo pa atendé ku puntonan di preokupashon di e komersiantenan den nos zonanan ekonómiko.  Esaki ta resultado di e último reunion general ku a tuma lugá dia 11 di Mei 2018, entre Minister, komersiantenan di Zona Ekonómiko, Curinde, Ministerio di Desaroyo Ekonómiko, kuerpo di Duana i e asosashon ku ta representá komersiantenan di Zona Ekonómiko (FREZACUR.)

 

Minister Martina a elaborá riba esfuersonan ku ta keda hasí pa mehorá konekshon aéreo, pa tantu pasahero komo karga riba término korto i pèrkurá pa un solushon duradero i sostenibel den futuro.  Meskos tin esfuersonan ta keda hasí pa fasilitá e prosesamentu di petishon di visa pa kumpradónan for di Haiti, Repúblika Dominicana i Cuba. Riba un plano mas haltu ta trahando riba un National Export and Logistic Strategy ku lo por habri portanan nobo pa empresanan establesé den nos zonanan ekonómiko.  Banda di tur esaki gobièrnu, den konsulta ku tur esnan relevante, ta re-evaluando posibilidatnan pa wak kon por bolbe hasi nos zonanan ekonómiko floresé, den un mundu ku a kambia hopi, i keda kumpli ku leynan vigente mundialmente.

 

Kambio den lei fiskal un preokupashon mayó

Un punto ku ta un berdadero preokupashon di e komersiantenan den zona ekonómiko ta e kambio den lei fiskal ku ta premirá di peligrá nan posishon kompetitivo i konsekuentemente nan entradanan.

Minister Martina a indiká ku e, huntu ku Ministerio di Asuntunan Ekonómiko i Curinde, ta hasiendo tur esfuersonan posibel pa wak kon por mitigá posibel konsekuensia di kambionan den nos lei fiskal ku ta drenta na vigor entrante 1 di yanüari próksimo.

 

.

Advertisements
%d bloggers like this: