Advertisements

“Maske kuantu antisosialnan sigui purba burla i pone e aparato hudisial den diskrepansia, gobièrnu lo keda hasi tur su esfuerso pa kombatí kriminalidat!”.

Parlamentario Jeser El Ayoubi (PAR):

“Maske kuantu antisosialnan sigui purba burla i pone e aparato hudisial den diskrepansia, gobièrnu lo keda hasi tur su esfuerso pa kombatí kriminalidat!”.

 

Realidat ta i ta keda ku mester keda hasi todo por todo pa kombatí kriminalidat anto esaki mester sosode riba tur nivel segun Parlamentario El Ayoubi.

Manera ta ampliamente konosí i komentá resientemente a tuma lugá un robo na un kompleho polisial na Rio Canario sin ku niun hende sa kiko a pasa eksaktamente. Banda di diferente kaso den pasado kaminda material i pruebanan konfiská a disparsé tambe nos ta kòrda e akto di ‘suisidio’ di un testigu klave den un investigashon penal na un otro warda di polis ku a kousa un impakto grandi den kuerpo polisial meskos ku den tur nivel di nos komunidat tambe sin ku niun hende sa eksaktamente kiko a pasa.

Kuantu situashon mas mester presentá pa nos mes stòp di burla i pone nos aparato hudisial den diskrepansia?

Pa motibu di nos propio mal kustumber di laga aña tras di aña pasa, sea kua sea e motibu, sin por kaba di atendé debidamente i strukturamentu ku diferente retonan riba tur nivel den nos komunidat, ta habri kaminda pa situashonnan no deseá tuma lugá.

P’esei sr. El Ayoubi ta lamentá ku e último hazaña di robo aki ku no ta kontribuí na e sentido di trankilidat i konfiansa tantu den KPC komo den nos komunidat.

Sr. El Ayoubi ta sigui bisa ku kredonan emoshonal ku e meta pa destituí sea minister di hustisia of kualke miembro di kuerpo polisial sigur lo no resolvé e problemanan ku mester di atenshon i akshon agudo ku kuerpo polisial ta konfrontá tantu riba nivel di labor, sosial i personal. Aki nos por referí na retonan básiko den e kadena hudisial ku a para bira fundamental i ku a sigui krese netamente pasombra no a duna nan e atenshon nesesario pa hopi aña.

Kombatimentu di kriminalidat sigur tin su bentaha i desbentaha tantu interno komo eksterno ku por trese sierto alterashon i por hasi un situashon delikado. Pero esaki no por nifiká ku tin sinta man krusá i laga kriminalidat take over.

Hopi trabou tin pa hasi i bastante kos tin pa kambia i pa koregí pa por mantené e imágen di konfiansa pa KPC por sigui “Sirbi i Protehá” adekuadamente.

Segun sr.El Ayoubi integridat di kuerpo polisial ta sumamente importante pa funshonamentu, kredibilidat i seguridat di tur ku ta laborá den e organisashon aki. P’esei kada akshon den maneho tin ku duna un sentimentu kaminda kada persona realmente ta komprometé ku nan responsabilidat.

Laga e suseso aki ta un “wake-up call” pa tur e partidonan enbolbí den e kadena hudisial kaminda  mester sigui traha ku pasonan firme pa ehekushon kontinuo di e maneho pa sigui baha kriminalidat den nos sosiedat i no laga kosnan keda drumi.

Komo siudadano i representante skohe di pueblo sr. El Ayoubi tin tur sertesa ku Minister di Hustisia tin e atenshon debido pa e situashonnan ariba menshoná i ta konta ku akshonnan korekto ta tumando lugá pa resolvé e kaso aki, atendé ku e nesesidatnan di personal di kuerpo polisial, update i upgrade e seguridat na e komplehonan polisial, rekobrá e produktonan hòrta den un tempu korto i trese esnan responsabel pa duna kuenta i rason pa nan aktonan kastigabel pa lei.

 

Advertisements
%d bloggers like this: