Advertisements

Deklarashon di Promé Minister na Parlamento tokante e situashon di Venezuela

Deklarashon di Promé Minister na Parlamento tokante e situashon di Venezuela

 

Parlamento 16 òktober 2018

Sr. Presidente, miembronan di Parlamento, un bon dia/bon tardi

E reunion di awe ta pa papia tokante e situashon di nos bisiña kerí, Venezuela. Manera tur koleganan sa, e situashon na Venezuela ta bayendo atras tur dia. Esaki ta djis un par di e impaktonan:

  • Tin un krisis polítiko ta tumando luga. Kada dia e separashon di poder ta deteriorá mas i mas.
  • Esaki ta trese un impakto ekonómiko. No solamente pa e pueblo di Venezuela mes, pero manera nos por mira i eksperensia, pa nos tambe na Kòrsou.
  • Tin un krisis humanitario ku ta tumando luga, ku ta trese kune un nivel haltu di migrantenan ku ta saliendo for di Venezuela i ta buska un porvenir den region. Kòrsou, komo isla den serkania, no ta eksepshon den esaki.
  • Tin krimen transnashonal i organisá ku tadesaroyando, ku ta enseráe redes di kontrabanda i trafikashon di hende, arma i droga .
  • Enfermedades transfronteras ta aumentando, ku ta forma un riesgo grandi pa ku malesanan manera malaria, tuberkulosis i sarampíon (measles).

E problemanan aki no ta afektá Venezuela so, pero tur pais den serkania. Pa e motibu aki various pais den region a kuminsa tuma akshon i posishon firme kontra di gobiernu di Presidente Maduro.

Argentina, Canada, Chile, Colombia, Paraguay i Peru a referí e situashon aki na e fiskal (prosecutor) di e Korte Penal Internashonal. Various pais manera Merka, Canada, Panama i Suisa a pone sanshonnan riba various miembro di e gobierno di Maduro.

Sr. Presidente, hasta Union Oropeo a pone sanshonnan riba varios persona tambe, ku Kòrsou tambe mester implementá.

Tin diferente inisiativa den nos region ku nos ta monitòr firmamente.

  • Aña pasá na Repúblika Dominikana ta tin intento pa kuminsa un diálogo entre e gobièrnu i oposishon.
  • E Organisashon di e Estadonan Merikano (OAS) tambe tin un instansia multilateralku e tarea pa atendé ku e situashon ku yama , Grupo di Lima. E Grupo aki ta konsistí di diesdos pais (Argentina, Brazil, Canada, Chile, Colombia, Costa Rica, Guatemala, Honduras, Mexico, Panama, Paraguay, Peru, Guyana i Saint Lucia). Reino Hulandes tin e status di observador den OAS, i pa e motibu aki no por partisipá den e Grupo di Lima. Komo Kòrsou nos ta keda monitòr e aktividatnan di aserka.
  • Durante mi bishita na e inaugurashon di Presidente Duque, Colombia a presenta un plan den kua nan ta proponé pa deliberá e situashon di Venezuela regionalmente. Kòrsou a duna su aporte na esaki, i a indiká di kier hunga un ròl aktivo den esaki.

Nos konose Venezuela komo “nuestros hermanos”. Si mi por tradusi un quote di JFK: Geografia a hasi nos bisiña, historia a sòru pa nos bira amigu, ekonomia e pone nos bira partner i nesesidat a sòru pa nos bira aliados. Destino a pone nos huntu, i nos no mester laga niun homber separá nos. Manera tur hende sa, Venezuela a yuda nos ora tin mester, manera un ruman grandi. E ehempel mas konosí, ta ora PdVSA a bin Kòrsou despues ku Shell a bai i nos a keda ku e refineria. Pero meskos ku rumannan tahasi, nos tambe mester por dùrf di bisa nos ruman grandi ora nan ta robes. Den kaso aki, bisa e persona(nan) ku ta responsabel pa e krísis den pais, te aki i no mas.

Di tur e impaktonan, esun ku ta afektá nos mas tantu ta e suidadanonan Venezolanonan ku ta biniendo Kòrsou dor di e situashon penoso na Venezuela. Mi ta enfatisáku e situashion di un fluho, ku ta kresiendo rapidamente, di migrantenan Venezolano mester wòrdu manehá na un manera urgente i balansá.

Ta krusial pa Kòrsou duna tratamento korekto i humanitario ma tur ekstranhero ku ta riba nos tera. Di otro banda, nos tin ku tene kuenta ku nos leinan di imigrashon. I tambe balansátur esaki ku interes legítimo di nos pueblo. Kòrsou ta den un situashon ekonómiko i finansiero fragil kaminda nos ta enfrentá diferente reto, pa menshoná algun: ,  desempleo haltu, situashon sosial i di bienestar ku mester atenshon i invershon

Nos no ta e úniko ku tin e problemanan aki. Nos partnernan den Reino manera Aruba ta den un situashon similar. Mi kolega Minister President, Sra. Wever-Croes tambe ta indiká ku nan tin problema finansiero ku ta ser impaktá mas dor di e situashon aki. Un otro ehèmpel ta Trinidat i Tobago ku tambe tin problemanan ekonómiko grave den nan pais i similar ku nos, i nan tambe tin problemanan ku e fluho di migrantenan di Venezuela.

Komo estadonan insular den desaroyo chikí òf Small Island Developing States (SIDS), nos tin un grado haltu di vulnerabilidat pa peligro natural i  humano i na mes momentu, un kapasidat di rekuperashon abou dor di elementonan físiko, sosial, ekonómiko i ambiental. Si nos tuma  e kaso di Venezuela, nos tur por mira ehèmpel di esaki: kon e krísis tin konsekuensianan grandi pa nos komo Kòrsou.

Na e momento aki nos kapasidat pa trata ku e impaktonan di e situashon na Venezuela ta minimal  dor di e situashon di nos pais ku mi a kaba di referí na dje i riba esei nos mester enfrentá e tenshon ku e migrantenan ta tresiendo kaba riba nos merkado laboral, bibienda, nos sektornan di salubridat i edukashon.

E paisnan na Latino Amerika ku ta mas grandi tambe ta sinti esaki. Por ehèmpel Colombia tin mas ku 1 miyon Venezolano. Pa e motibu aki, Colombia a prepara un interkambio ku paisnan den region.

P’esei nos a keda implementá nos maneho di migrashon ku ta enserá ku tur persona ku  no tin e dokumentonan adekua, mester bai bèk SI nan no bini na remarke pa haña protekshon bou di artikulo 3 di EVRM. Pero mirando e situashon deplorabel na Venezuela, nos ta keda monitòr paso nos no sa ta kon largu nos por keda hasi esaki. Ta un balansa difisil ku nos mester mantené, komo nos tin ku kumpli ku nos interés nashonal i konsiderá nos limitashonnan.

Paso si e situashon ta sigi asina, e hendenan di Venezuela lo hui komo ku nan bida, seguridat i libertat ta bou di menasa dor ku nan derechinan humano na nan pais di origin ta ser violá i trampá (definition Cartagena Declaration). Nos tin ku tene bista riba e situashon i keda puntra nos mes: Nos por manda hende bèk sabiendo kiko lo pasa ku nan?

Pa motibu di e retonan aki, nos tin ku wak den direkshon di Reino, pa nos por duna un trato humanitario akseptabel. No pa pidi limosna, ni fabor! Pero pa nos komo Reino traha konhuntamente riba esaki, pa e siguente motibunan:

  • komo Reino tin un deber pa segurá ku derechi di humano ta garantisá.
  • tin ku garantisá kumplimentu ku nos obligashonan den kuadro di derecho internashonal;
  • I mas importante, pa nos imagen internashonal komo Reino, paso no ta Kòrsou, ni Hulanda ku ta firma e tratadonan internashonal, manera indiká den artikulo 5, prome párafo di e Estatuto di Reino. Ta Reino Hulandes ta firma esaki.

Esaki ta e konklushonan di varios rapòrt presentá dor di Amnesty International, Human Rights Watch i hasta dor di nos propio Ombudsman i various ekspertonan den nos komunidat.

Reino Hulandes ta para pa responsabilidat di tur pais den Reino pa para riba nan propio forsa, pero ku e boluntat mutuo di yuda otro. Ta esaki nos a profilá durante e kampaña di Reino pa e asiento den e Konseho di Seguridat di Nashonnan Uni (VNVR): nos ta “un Reino ku kuater pais”, e partner internashonal pa pas, hustisia i desaroyo.

Ta un realidat awor, ku nos tin mester di sosten di Reino pa nos por ofrese e trato korekto i humanitario segun lei internashonal, no solamente pa Venezolanonan ku ta bini Kòrsou, pero pa un i tur. Den e kaso aki, nos por referí na e artikulo 36 di Estatuto ku ta indiká ku Hulanda, Aruba, Kòrsou i Sint Maarten lo sostené i duna asistensia mutuo. I tambe den artikulo 38 ku ta indiká ku Hulanda, Aruba, Kòrsou i Sint Maarten por traha areglo mutuo. Den e kuadro aki mi lo ke propone un taskforce tékniko di Reino pa hasi un propio evaluashon profundo di e sitashon aktual, informá e organisashonnan internashonal i proponé rekomendashonnan pa stimulá koperashon entre e kuater paisnan den Reino riba e tema di migrashon i derechi humano. E sanshonnan tambe lo ta un tópiko pa e grupo di trabou aki.

Ke men nos TIN ku yuda otro- e paisnan den Reino, pa nos por yuda nos mes, i yuda den nos region.

Mi kier a kaba ku un otro dicho. Esaki ta di e jefe di e Organisashon Internashonal di Migrashon, IOM, Sr. William L. Swing, “migrashon ta un proseso, no ta un problema”. ‘Es decir’, migrashon ta tuma lugá tur kaminda, laga nos tuma e oportunidat aki pa mustra nos forsakomo Reino, nos potensial pa traha huntu ku otro den Reino i den region i nos kapasidat di hasi esaki na un manera humanitario.

Advertisements
%d bloggers like this: