Advertisements

Temporada drùk di kùrmentu di vehíkulo a kuminsá

Temporada drùk di kùrmentu di vehíkulo a kuminsá

Willemstad – Di òktober pa mart ta e temporada di mas drùk pa loke ta kùrmentu di vehíkulo na Servisio pa Tráfiko i Transporte (UO-VV). Den e kuadro aki, UOVV ta hasi un apelashon na tur doño di vehíkulo pa bin kùr trempan i evitá inkumbinensia.

Tur vehíkulo motorisá mester kùr pa nan por kore riba nos kareteranan. Pekùp, trùknan grandi i vehíkulonan ku pèrmit pa transporte públiko ta kùr kada aña, i sobra vehíkulonan ta kada dos aña. Ta hopi importante pa vehíkulonan ta di kùr. Esaki ta pa garantisá seguridat den tráfiko, mirando ku e vehíkulo ta den kondishon optimal pa e por kore sigur i ta evitá but.

Kontròl tékniko di vehíkulo
Na momentu ku mester bai kùr, tin diferente aspekto tékniko ku e ‘keurmeester’ ta kontrolá, manera entre otro: e pitu mester ta zona bon; waipernan mester ta traha bon; lusnan di outo, sea dilanti òf patras, mester sende; ‘richtingwijzer’ dilanti i patras na kada banda mester sende; tayernan mester ta bon; e brek mester wanta bon; hantrèm mester funshoná bon, etc. Ta rekomendabel pa laga un mekániko tira un bista promé ku bai kùr pa evitá ku e vehíkulo no ta pasa e proseso di kùr ku éksito.

Sita pa kùr
Pa medio di pòst, UO-VV ta manda sita pa kùr vehíkulo, i si pa un òf otro motibu esaki no ta e kaso, por akudí na Lokèt di Pèrmit na Saliña pa buska un fecha. Tambe por yama na number di telefon 0800-1515 (grátis) i 433-3123 òf via di e e-mail: sita@gobiernu.cw.

Riba e dia ku tin sita mester akudí na UOVV (ántes Keuringslokaal) trempan ku e karchi di kùr bieu, identifikashon bálido, mas e suma rekerí ku ta fl. 30,=. Por ‘swipe’ òf paga ku sèn kèsh.

Na momentu ku e parti di kùr ta tras di lomba ta haña un karchi di kùr nobo ku ta bálido p’e próksimo periodo.

Minister Jesus Leito ta spera ku tur doño di vehíkulo ta kumpli ku nan deber síviko di kùr nan vehíkulo i asina kontribuí na un tráfiko mas sigur.

 

Advertisements
error: Content is protected !!
%d bloggers like this: