Advertisements

REFINERIA DI KORSOU TA DESMENTI DI TA NA HOUSTON PA FIRMA MOU

REFINERIA DI KORSOU TA DESMENTI DI TA NA HOUSTON PA FIRMA MOU

Willemstad 15 di Òktober 2018- E loke a keda publiká den medio di komunikashon, esta ku aktualmente tin un delegashon di Refineria di Kòrsou (RdK) na Houston Merka pa firma un Memorandum òf Understanding (MOU) ku un kompania Merikano den kuadro di e búskeda pa un partner stratégiko pa nos refineria, ta inkorekto. Gerensia di RdK, pa medio di e komunikado aki, ke desmentí e informashon menshoná i informá komunidat ku esaki no ta e kaso.

Bèrdat ta ku e siman aki tin un delegashon di RdK na Houston na Merka. E rason pakiko ta reuní na Houston ta ku aki mayoria di kompanianan den mundu petrolero i di refinashon tin un presensia, si no ta nan ofisina prinsipal na Houston. Pues e echo ku e delegashon di RdK ta hiba e kombersashon na Houston no por keda tumá komo indikashon ku ta ku kompanianan Merikano so ta papiando kuné.  

Durante di e bishita e delegashon lo atendé dos asuntu; esta hiba kombersashon ku kandidatonan ku a entregá un proposishon final pa yuda den mantené nos refineria habri i na mes momentu hiba e promé kombersashonnan ku kompanianan ku den promé instante a kualifiká komo un kandidato potensial pa papia kuné i sigui den e trayekto di búskeda di un partner stratégiko ,despues ku e kòntrakt aktual di maneho i operashon di refineria terminá na fin di 2019.

Ta bon pa enfatisá ku den niun di dos kaso lo no tin firmamentu di un MOU. Kualke eventual MOU e.o. ta suheto na aprobashon di Hunta di Komisario di RdK, algu ku lo mester tuma lugá despues ku RdK kaba di hasi e trabou preliminar ( ku aktualmente ta tumando luga.)

RdK lo keda mantené komunidat informá, na un forma transparente, kon e proseso di un búskeda di un partner stratégiko pa nos refineria i un terser partido pa yuda den mantené nos refineria habrí, ta kanando. Ta un proseso kompliká ku ta eksigí madures di nos tur afin ku nos ta logra un pronto operashon di e refineria i un futuro ku ta brinda bienestar na nos komunidat.

 

Advertisements
%d bloggers like this: