Advertisements

Parlamentario Gisette Seferina (PAR): A YEGA ORA PA TUMA SEGURIDAT DI INFORMASHON PERSONAL NA SERIO!

Parlamentario Gisette Seferina (PAR):

A YEGA ORA PA TUMA SEGURIDAT DI INFORMASHON PERSONAL NA

SERIO!

 

WILLEMSTAD- Parlamentario Seferina (PAR) ta di opinion ku mester hasi muchu mas na konsientisashon di nos pueblo ora ta trata protekshon di informashon personal di siudadanonan di nos isla. Ta masha importante pa kada persona evaluá konsekuensia di su aktividat riba medionan sosial pero tambe e informashon personal ku kada persona ta kompartí pa via mas konvenshonal. E tipo di informashon i kuantu informashon un hende ta divulgá di su mes por hasta komprometé su propio seguridat i di su famia.

Gisette Seferina (PAR) ta pensa ku nos pueblo falta hopi informashon riba e posibel konsekuensianan serio ku e manera informal ku nos a kustumbrá trata ku nos datonan vital manera number di sédula, fecha di nasementu, adrès di kas, number di telefòn, etcetera, etcetera… E informashon vital di un hende ta loke ta identifiká e hende ei komo residente legal den nos pais, i ta pa medio di e informashon vital aki instansianan ofisial ta determiná derecho- i debernan di kada siudadano.  

Parlamentario Seferina ta remarká ku tin hopi hende ku ta hasi uso di media sosial manera Facebook i WhatsApp riba kua hopi informashon personal i konfidensial ta sirkulá huntu ku potrèt i otro detayenan personal.  “Avansenan impreshonante den teknologia ta hasi masha fásil awendia pa malusá informashon personal di hende pa finnan kriminal i/o perhudisial pa e propio doño di e informashon en kuestion”. Komo ehèmpel e parlamentario ta mustra riba kasonan tantu lokal komo internashonal den kua ta usa  informashon konfidensial di hende optené di fuentenan públiko pa abri kuenta na banko o fia merkansia, o personifiká un hende riba medianan sosial. Ku e informashon aki un hende mal intenshoná por abri un kuenta falsu via kua por difundí ‘fake news’. Tambe sa usa un kuenta falsu pa difamá hende riba facebook, tur esaki hasiendo uso di informashon ku e persona víktima di e fechoría aki mes a kompartí ku hende- o instansia ku no tin ningun obligashon legal pa mantené privasidat di hende .

“Loke ta preokupá mi e manera ‘nonchalant’ ku, apesar di e echo ku notisia di hòrtamentu di identidat di hende i kiebro ku privasidat ta birando mas frekuente, tòg ta sigui eksihí pa un partisipante na un rifa pone su number di sédula riba e lòt, siendo ku tin otro manera ku por identifiká e partisipante.” Seferina no ta komprendé tampoko kon bini ta mustra lòt ganadó na pleno televishon o den korant i asina ekshibí tur informashon vital, inkluso number di sédula i adrès físiko di e ganadó. “Nos ta realisá ku e práktika aki por peligrá seguridat i privasidat di e ganadó i su famia??”, asina Seferina ta puntra. Mas aleu e parlamentario ke sa kiko ta pasa ku e lòtnan ku no kai den premio. “Ta simplemente afó ta tira nan? Tin un eksigensia den e pèrmit di sorteo pa destruí e lòtnan promé ku tira nan afó?”

Seferina alabes ta indiká ku e ta bai dirigí un karta ku preguntanan adishonal na e minister enkargá ku maneho di gobernashon, planifikashon  i servisio públiko (BPD). “Ta importante pa pueblo realisá ku kada persona tin un responsabilidat pa protehé su informashon vital i di eksihí ku ken ku e duna e informashon aki tambe mester atendé kuné di un forma responsabel pa garantisá privasidat i seguridat di e kliente”, asina Seferina a konkluí.

 

 

Advertisements
error: Content is protected !!
%d bloggers like this: