Advertisements

E último gota ku a pone e hèmber basha afó.

E último gota ku a pone e hèmber basha afó.

Komo parlamentario un di mi obligashonnan ta di kontrolá gobièrnu i su maneho. Manera ta konosí pa hopi hende último lunanan mi a bini ta pone hopi énfasis riba e kadena hudisial. Motibu di esaki ta ku mi ta konstatá konstantemente hopi kos for di òrdu i fuera di prosedura ta tuma lugá . Tambe mi ta tuma nota ku no ta atendé ku e parti di seguridat di un forma serio, responsabel i profeshonal. Último simannan frakshon di MAN ta bin ta tuma nota  di diferente situashon di preokupashon den nos kadena hudisial. Den prensa nos por a tuma nota ku pa algun tempu kaba tin un situashon di drone ku ta bula riba prizòn, ku a trese hopi preokupashon serka nos i ku a terminá den un wèlga na prizòn. Esaki ta algu ku sigur un miembro di nos frakshon a bini ta trese dilanti den reunionnan anterior i ku tambe a hasi un bishita di trabou algun luna pasa na prizòn pa asina por tuma nota ku su propio wowonan ki e situashon real ta. Ta fresku den nos memoria kon deskonosí nan a los diferente tiru na entrada di prizòn di kual a laga hopi trahadó den sustu. Pa nos ta importante pa kada trahadó ku ta sali su kas tur dia di nobo bai laborá ta sinti su mes sigur na su boka di trabou i tambe esnan ku ta enkarselá den prizòn.

Fuera di esei tin un otro situashon kaminda nos a bin ta komprondé ku kura di raspa kaminda ta warda outo konfiská no tin niun hende pa tira bista riba e vehíkulonan stashoná ei den. Den pasado tabatin un kompania di seguridat tabata sòru pa esaki pero aktualmente esei no ta e kaso mas. Tambe riba e tereno di polis na Rio Canario tin diferente vehíkulo ku pa un motibu òf otro ta den investigashon di kual tur dia tin deskonosínan ta hòrta piesa for di e outonan. Tambe riba e mesun tereno ei a tuma lugá un robo di 2 motor di boto di kual ta imposibel pa dos òf mas hende por karg’e bai kuné i tambe a sende kran di polis na kandela. Otro kaso lamentabel ta na garashi di polis kaminda a kima vários outo di polis algun tempu pasa.

Durante wikènt último nos a tuma nota di un robo ku a tuma lugá na warda di recherche na Garipituweg den kual a bai ku basta droga  ku a keda konfiská durante akshon polisial.

Frakshon di MAN ta di opinion ku e atentado riba departamentonan hudisial ta birando dia pa dia mas grandi i nos lo ke sa konkretamente kiko Minister di Hustisia ta bai hasi pa frena esaki mas tantu posibel. Hopi di e situashonnan aki ta kosnan ku ta hinka gobièrnu den gastu innesesariamente mirando ku no ta tuma pasonan pa garantisá materialnan ku a keda konfiská. Relashoná ku esei frakshon di MAN a manda un karta pa presidente di Parlamento pa konforme artíkulo 33 di reglamentu di órden di Staten konvoká un reunion di komishon sentral ku karakter di urgensia pa nos deliberá ku Minister di Hustisia enkuanto seguridat den e kadena hudisial.

Advertisements
%d bloggers like this: