Advertisements

Lansamentu di programa “Kunukito di Kas i di Bario” den Buena Vista tabata un éksito!

Lansamentu di programa “Kunukito di Kas i di Bario” den Buena Vista tabata un éksito!

 

Kòrsou- Djabièrnè 12 di òktober na After School Academy (Child First Foundation), Buena Vista a tuma lugá lansamentu di e programa “Kunukito di Kas i di Bario”. Meta di e programa ta pa mehorá salú di komunidat di Kòrsou dor di promové nutrishon balansá y seguridat alimentisio partikularmente bou di mucha i hobennan i kombatí pobresa.

Durante e akto di lansamentu di e programa, Minister Suzy Camelia-Römer a splika e vishon pa ku “Kunukito di Kas i di Bario”. E minister a elaborá riba e konsepto di Wellness, prevenshon i tambe kuido primario i a duna di konosé ku e programa den su prome fase lo enfoká riba e kuater barionan di Programa di Urgensia ku ta Montaña, Otrobanda/Ref, Buena Vista i Barber. Despues, e programa lo pasa pa otro barionan ku a keda selektá basá riba un investigashon di estado di salú ku e instituto Volksgezondeheids Instituut Curaçao a hasi resientemente.

A skohe pa lansa e programa netamente den Buena Vista, mirando ku ta trata un bario ku ultimamente tabata basta negativo den notisia, pero kaminda habitantenan huntu ku diferente instansia i gobièrnu ta trahando huntu na desaroyo positivo di e bario.  

Habitantenan ku keda selekshoná pa partisipá na e programa den e bario lo sigui seshonnan di informashon i konsientisashon ku tin komo meta pa trese kambio positivo den nos sistema di alimentashon, stimulá i siña habitantenan planta na kas i den bario, produsiendo nan propio fruta i bèrdura (workshops di plantashon). Mas aleu habitantenan lo haña konosementu kon pa kome salú sin saka (hopi) sèn, kon pa kushiná ku produktonan natural di nan propio kosecha (Tayer Kome Salú) i kon traha nan propio kunukito. Plantamentu na kas no ta algu nobo. Hopi hende aki na Kòrsou a lanta den un kas kaminda ku den kurá tabatin diferente yerba, fruta i bèrdura ku nan mes a planta. Ku tempu tur e tradishonnan aki tiki tiki a bai atras. Ku e programa Minister Camelia-Römer ke rebibá e kustumber bèk den nos komunidat.

Lo tin un seshon di informashon general pa tur habitante di Buena Vista ku kier partisipá ku lo tuma lugá djarason awor 17 di òktober, 6.30 pm na After School Academy (Child First Foundation) na Manhattanweg 6, Buena Vista. Tambe por pasa i inskribí bo mes di djaluna te ku djaweps 18 di òktober, di 4.00-6.00 pm na ofisina di After School Academy.

.

.

Advertisements
error: Content is protected !!
%d bloggers like this: