Advertisements

Diskurso dia di outonomia 10-10-2018. KORSOU TIN SU PROPIO DESTINO DEN SU MAN

Diskurso dia di outonomia 10-10-2018.
KORSOU TIN SU PROPIO DESTINO DEN SU MAN

Riba 10/10/2018 ta pa di 9 biaha ku nos ta kòrda bahamentu di Bandera di Antia Hulandes i e subimentu di nos bandera di Kòrsou riba Plasa Brion, komo símbolo ku nos a optené outonomia komo pais Kòrsou;
te awe tin hopi konfushon i diferente hende ta puntra si ya nos no a optené nos outonomia kaba for di 15 dezèmber 1954 ? I ta kiko asina tin speshal pa nos para ketu na 10 òktober si ya kaba nos tabatin outonomia?
Awèl ta importante pa aklará ku Kòrsou promé ku 10/10/10 no a konosé outonomia.
Kòrsou tabata forma un pais huntu 5 otro isla den e teritorio di Antia Hulandes (ántes bou di e status kolonial Curaçao en Onderhorigheden);
Konsekuentemente gobièrnu di Kòrsou no tabatin e outonomia manera awe.
Gobièrnu di Kòrsou i pueblo di Kòrsou tabata dependiente di régimen di gobièrnu di Antia, ku tabata konsistí di 6 isla i despues ku Aruba a sali riba 1 yanüari 1986, a keda Kòrsou huntu ku 4 isla mas den e konstelashon Antia Hulandes.
Riba 10 òktober 2010 Antia Hulandes a stòp di eksistí, nos a baha e bandera i Kòrsou a bira un pais outónomo den Reino Hulandes.
Outonomia ta nifiká simplemente bisa ku nos tin e potensial pa traha nos propio leinan, hiba nos mes maneho i hasi nos mes kosnan. Den palabra difísil nos ta yama esaki: outodeterminashon!
Outonomia ta duna nos un grado grandi di libertat, pero semper teniendo kuenta ku desaroyonan rondó di nos i ku por influensha nos.
Esaki ta un desaroyo importante den historia di Kòrsou.
Kòrsou for di 10/10/10 tin práktikamente tur instrumènt den su propio mas
E pregunta grandi ta: kiko nos kada unu ta hasi pa nos desaroyá i elevá Kòrsou?
Òf hopi di nos ta sinta wak otro pa kibra otro, kibra inisiativanan, stroba Kòrsou di bai dilanti?
Bo a puntra bo mes for di dia Kòrsou a bira outónomo, esta ku nos mes ta bas den nos kas: kiko abo a hasi pa Kòrsou ta mihó ku e tabata na 2010?
Laga nos pensa i reflehá!
Un kos nos por bisa sigur: pa nos a yega na e status outónomo den Reino, nos mester drai i wak bek un ratu den historia:
Nos historia ku ketu bai ta den moveshon!
Ku orguyo pueblo di Kòrsou por mira bèk riba su historia estatal ku a wòrdu desaroyá, kultivá i mantené dor di suidadanonan ehemplar di nos isla for di 1499 te presente.
E historia di Kòrsou ta unu riku i diverso. Diferente suidadano lokal i tambe estranheronan ku a establesé nan mes na Kòrsou, a sa di hiba un òf mas lucha di un manera konstante pa asina yega na derechi di igualdat, na emansipashon di un pueblo i asina krea un historia bibu pa Kòrsou…. un historia den moveshon.
E luchanan aki tabata bon fundá i nan a sosodé den forma di relevo (di generashon pa generashon) pa asina por a inisiá, kontinuá i mantené e proseso di emansipashon di Kòrsou.
Personahe nan manera e.o.: Tula pa libertat di katibu, Damanan di djarason ku a uni forsa na 1948 pa introdukshon di derecho di voto pa hende muhé na Kòrsou, Doktor Frumensio da Costa Gomez, ku a presidí e lucha pa Status outónomo di Antia Hulandes na 1954; luchadónan manera sr. Stanley Brown i Wilson Godett a lucha fuertemente 30 di mei 1969 pa mehoransa di e legislashon laboral;
Na 1993 sr. Miguel Pourier ku a organisá e promé referèndem statutario pa “Status Aparte”.
Na 2010 sra. Emily de Jongh-Elhage, den kalidat di e lastu premier di Antia Hulandes, a negoshá pa Kòrsou haña e status outónomo den Reino Hulandes.
E pèrsonanan aki por i ta wòrdu konsiderá i rekonosé komo hòmber I muhénan grandi den historia di Kòrsou ku a sa di pone e proseso estatal di Kòrsou den moveshon.
Kada unu a trese un moveshon den e proseso pa emansipashon den nan propio periodo, kual a sirbi pa e totalidat a kana di un manera ekselente i magnífiko pa un proseso kolektivo i eksitoso pa Kòrsou.
Gobièrnu di Kòrsou un biaha mas kier gradesí tur e personanan envolví i o nan famia pa nan aporte i kontribushon duná den e moveshon estatal aki ku a kontribuí di un manera òf otro na outonomia di Kòrsou. Nos mester ta agradesido i yama danki: DANKI!!
E proseso pa optené outonomia, ku Kòrsou a pasa aden, ta kuadra netamente ku e prinsipionan di “Nation Building”. Esaki ta enserá ku un pais ta traha riba su propio futuro, pa asina konstruí i desaroyá un pais pa sirbi su propio propósito.
Un otro meta di “Nation Building” ta pa uni un pueblo huntu ku su pais di manera ku huntu nan por forma un isla i pais fuerte
Gobièrnu den su afan pa strukturá i konstruí un mihó nashon mediante di su pueblo, kier enkurashá e inisiativa serka e pueblo di Kòrsou, mediante e programa di gobernashon.
Ta un oportunidat úniko pa un pais por traha riba “Nation Building”, konstrukshon di un nashon huntu, saliendo for di union den diversidat, manera: Religion i kreensia(nan) religioso, Etnisidat, kredo polítiko i situashon sosial i ekonómiko.
Den e kuadro ariba menshoná, pueblo di Kòrsou tin mester di mas “Nation Builders”….. I nos TIN nan!!!.
Laga kada un di nos ku por forma e “Building Blocks” duna di nos parti pa e pais por prosperá.
Nos tin nos futuro den nos mes man, nos no ta dependiente di otronan ni por tira falta riba otronan. Tur karta ta den nos mes man.
Bibando un bida outónomo pueblo, esta kada un di nos, ta deskubrí i realisá su propio ròl den nos komunidat i ta krea asina un plataforma di disponibilidat pa traha huntu.
Mas fuerte aún, hibando un bida ku un pensamentu outónomo, pero ku e mira pa traha huntu, nos ta promové harmonia soshal, konsenshi, emansipashon i alabes un desaroyo ekonómiko den nos pueblo.
Kresementu di un nashon ta sosodé solamente ora ku un pueblo ta sostené i karga e ideanan i plan nan akordá. Balor klave den esaki ta komunikashon efektivo, komprenshon mutuo, toleransia, un vishon fiho. Mas ku tur kos, e ta un kompromiso general di pueblo pa pueblo!
Huntu……. Solamente huntu nos por logra krea un Kòrsou realmente outónomo I próspero.
Ta mi konvikshon fuerte ku pa nos por logra un mihó pais, nos mester kere ku nos por i kuminsá kaminda nos por, trahando huntu ku otro ku un propósito nos dilanti. Traha huntu djis pa bisa ku nos ta traha, nos no ta yega.
Laga nos ban wak huntu den e binokular o teleskop pa nos por sigui traha kada un di nos huntu pa un mihó Kòrsou!

Marilyn Alcalá Wallé
Minister di E.S.K.D.

 

 

.

.

.

.

.

.

.

.

 

Advertisements
error: Content is protected !!
%d bloggers like this: