Advertisements

Rotary Club Willemstad ta lanta 10.000 patu di baño fo’i soño! ‘Nan no por warda pa tira nan dùik di tur aña den Waaigat!’

Rotary Club Willemstad ta lanta 10.000 patu di baño fo’i soño!
‘Nan no por warda pa tira nan dùik di tur aña den Waaigat!’

Kòrsou – 10 di òktober 2018: Djadumingu 4 di novèmber 2018 di 13:00 te 19:00, Rotary ta organisá e evento públiko ya kaba hopi konosí serka tur hende, e “ Duck Race riba Waaigat”.
Durante e próksimo simannan ta finalisá tur detaye, pa e espektákulo aki por bira unu inolvidabel. Rotary ta organisá e evento pa Fundashon Encelia, un fundashon ku ta ofresé akohida di krísis pa mucha entre 4 i 12 aña. Rotary ta sostené Encelia for di 2015, pa nan por kontinuá nan trabou di un manera responsabel. Pues, ‘Save the Date’.

E Duck Race di Rotary ta un evento pa famia hopi dushi. Meskos ku aña pasá, tin diferente wega i aktividat pa mucha, manera ‘Water City’. Tin un tarima yená ku diferente aktuashon espektakular i kaminda diferente skol di baile lo duna presentashon. DJ Maarten Schakel i Ethan Morris, entretantu karanan konosí na Duck Race, lo perkurá pa un aktividat total ku hopi zjeitu.
Rotary ta hopi orguyoso tambe ku Randal Corsen Orchestra, featuring Dibo D, Rich Pieter & Yumarya Grijt lo duna un presentashon pa e evento di Duck Race akí. Riba tereno kulinario tin hopi kos dushi pa disfrutá di dje den e ‘Foodcourt’ i na e ‘Bar’ naturalmente tin kos di bebe. Organisashon ta den full swing i tur kos ta mustra ku ta bai bira un dia tremendo.

Kulminashon di e dia naturalmente ta bashamentu di 10.000 patu den Waaigat, for di un kònteiner ku ta 20 meter na haltu hisá. Den añanan anterior esaki a trèk hopi bishitante bini Waaigat, ku na e okashonnan ei tabata mustra kompletamente gel dòrná ku míles di patu tur kaminda. Esaki ta e di 3 edishon di Duck Race kaminda patunan di baño, pushá pa bientu ta ‘landa’ bai nan meta final.
Esnan ku a adoptá e patunan ku ‘landa’ yega final promé, ta bai gosa di un pakete di fakansi fantástiko pa 4 persona. Banda di esaki durante di dia por gana vários otro premio. E ganadónan por mèldu te 19:00 serka e organisashon. Adoptá un patu kumprando un karchi pa 10 florin i sostené e trabou fantástiko di Fundashon Encelia.

Benta di karchi a kuminsá kaba na 7 diferente punto di benta: 24 Uur uit de muur, Mensing’s Caminada, Bruna, TUI-reisbureau, Van den Tweel (Janthiel & Zeelandia), Intertoys (Sambil & Caracasbaaiweg), Mau A Sam Travel, Oasis Carol Estate, Paletas Curaçao venues i tur Rotary Club Willemstad fellows. Den añanan anterior hopi kompania tabata partisipá kumprando karchi i partiendo esakinan den nan organisashon òf regalando nan klientenan. Nan por tuma kontakto via rcwduckexperience@gmail.com. Keda na altura via e página di Facebook di Rotary Club Willemstad i bini Waaigat 4 di novèmber próksimo!

Advertisements

Skibi bo komentario / Opinion

This site uses Akismet to reduce spam. Learn how your comment data is processed.

%d bloggers like this: