Advertisements

Prengunta na Minister Jesus-Leito, relashona ku sistema di Pagatinu

Na: Minister di VVRP
Sra. Zita Jesus-Leito
PRESENTE

Kòrsou, 9 di òktober 2018

Tópiko: Tarea di BTP&U komo reguladó ta un tarea ku ta bai mas leu komo solamente kontrolá faktura i gastunan i fiha preis. Ta responsabilidat di BTP&U pa kontrolá kalidat i tambe investigá keho nan riba e produktonan ku nan ta regulá, manera e hopi kehonan ku tin riba Pagatinu.

Honorabel Sra. Zita- Leito,

Pa medio di e karta aki suskrito kier pidi Minister su atenshon pa lo siguiente.

Ta asina ku den nos komunidat tin hopi reklamo riba e produkto di Aqualectra ku yama Pagatinu. Bastante ta e siudadanonan ta konstatá ku e pagatinu ta kaba lihe for di ora ku nan a pasa di e sistema di paga nan resibu na fin di luna pa medio di un meter di koriente pa e sistema di Pagatinu.

E keho aki tin basta tempu ta biba den nos komunidat i Aqualectra komo e empresa ku ta entrega e produkto lógikamente ta argumentá ku e keho aki no ta korekto, loke no ta sorprendé nos, debí ku komo produktor i distribuidor di awa i koriente ta mas ku lógiko ku Aqualectra lo defendé su produkto.

Pero pa nos esun yama pa skucha, investigá i informá pueblo ta e reguladó ku den e kaso aki ta BTP&U. Manera ya menshoná BTP&U su tarea no ta solamente regulá preis di e produktonan ku nan tin e tarea pa regulá, pero ta nan deber tambe pa na promé lugá pueblo risibí e kantidat di Kwh. ku nan tin derechi riba dje konforme e lista di preis di Aqualectra i tambe e kalidat di e produkto i e meternan ku ta wòrdu usa mester wòrdu kontrolá dor di BTP&U.

A base di esaki nos kier hasi e siguiente preguntanan na Minister Jesus-Leito konforme artíkulo 96 di Reglamento di Orden di Parlamento;

Preguntanan:

⦁ Minister por informá Parlamento kon BTP&U ta hasi kontrol di kalidat riba e produktonan ku nan tin bou di nan komo reguladó?

⦁ BTP&U ta konsiente ku komo reguladó nan tin e responsabilidat di skucha pueblo su inkietut nan riba produktonan ku nan ta regulá i hasi e investigashonnan nesesario?

⦁ BTP&U ta dispone di un departamento ku ta enkargá su mes ku e tarea di kontrol di kalidat i tambe ku e pueblo ta haña di bèrdat e kantidat di Kwh. den e kaso aki ku nan ta paga p’e?

⦁ Minister a yega di skucha e kehonan for di komunidat riba e sistema di Pagatinu ku Aqualectra ta ofresé na komunidat?

⦁ Kon BTP&U ta atendé ku kehonan ku ta sali for di komunidat, manera den e kaso aki esun di Pagatinu?

⦁ BTP&U a yega di hasi investigashon riba e sistema di Pagatinu ku Aqualectra ta ofresé na komunidat?

⦁ Si kontesta na pregunta seis (6) ta afirmativo, Minister por fasilitá Parlamento resultado di e investigashon aki.

⦁ Si no a yega di hasi ningun investigashon riba e sistema di Pagatinu, Minister lo instruí BTP&U pa laga hasi un investigashon profundo riba e sistema di Pagatinu, pa asina pueblo por sa ku loke nan ta konstatá ta bèrdat si òf no?

Frakshon di MFK representá den e kaso aki pa Parlamentario Gilmar “Pik” Pisas ta spera di haña kontesta mas pronto ku ta posibel riba nos preguntanan, pa asina pueblo por sa ku si loke nan ta konstatá ku e sistema di Pagatinu, esta ku e koriente ta kaba mas lihé ku ora tin un meter, ta kuadra ku bèrdat i ku tambe ku a hasi un kontrol di parti di un órgano independiente manera BTP&U.

Atentamente,


Gilmar “Pik” Pisas
Miembro di Parlamento
Frakshon di MFK
Na: Presidente di Parlamento di Kòrsou
Sr. W. Millerson
Wilhelminaplein # 4
PRESENTE

Kòrsou, 27 di sèptèmber 2018

Apresiabel Sr. Millerson,

Pa medio di e karta aki, hasiendo uso di artíkulo 96 di reglamentu di órden
di Parlamento, mi ke pidi bo persona pa dirigí e karta athunto na Minister Zita Jesus-Leito enkargá ku VVRP, ku preguntanan ku mi persona ta hasi na e minister konserní.

Danki pa e koperashon.

Atentamente,


Gilmar “Pik” Pisas
Miembro di Parlamento
Frakshon di MFK

 

Advertisements

Skibi bo komentario / Opinion

This site uses Akismet to reduce spam. Learn how your comment data is processed.

%d bloggers like this: