Advertisements

Reunion General di Pueblo Soberano ta eligí su Lider Polítiko nobo pa aklamashon.

Curaçao 8 òktober 2018

 

Reunion General di Pueblo Soberano ta eligí su Lider Polítiko nobo pa aklamashon.

Djadumingu 7 òktober atardi, den un Reunion General, miembronan di Pueblo Soberano den un mayoria a disidí pa no warda te 4 novèmber, fecha stipulá pa tene elekshon pa lider polítiko, ma pasa mes ora over pa vota pa aklamashon.

Miembronan presente, despues ku e presidente di e komishon ku a  organisá elekshon di Lider Polítiko a anunsiá e kandidato,  Dr. Bernard (Ben) Whiteman, a reakshoná hopi entusiasmá riba e anunsio.

Despues di un spich kòrtiko, miembronan a haña oportunidat di hasi pregunta i òf duna remarke òf opinion.

Sr Whiteman ta duna un relato di kiko a oblig’é  pa drenta polítika bèk.

“E echo ku kada dia ku pasa mi ta mira un deterioro sin presedente na Kòrsou i e echo ku tur dia riba kaya hendenan ta aserká mi pasó nan a pèrdè trabou. Tur dia lugánan i negoshinan ta serando un tras di otro. Un estilo di gobernashon sin niun klase di bèrgwensa.”

Mirando ku, defakto, no tabatin mas kandidato den kontienda, miembronan a sugirí pa tuma desishon mes ora i vota pa aklamashon, pasó no tin sentido pa prolongá e proseso.

Un gran mayoria a bai di akuerdo ku e proposishon i Pueblo Soberano awe tin su Lider Nobo den e persona di dr. Bernard (Ben) Whiteman, x Minister Presidènt di Kòrsou, pa Pueblo Soberano. Durante su disertashon despues di su postulashon  dr Whiteman a bisa, sitando nos gran lider dfm. Helmin Wiels, ”Nos no mester puntra kiko Kòrsou por hasi pa nos, pero kiko nos por hasi pa Kòrsou. Nos  no mester puntra kiko Pueblo Soberano por hasi pa nos, pero kiko nos por hasi pa Pueblo Soberano.”

Tambe riba petishon di dr Whiteman,  Reunion General unánimemente a  nombra pa aklamashon Helmin Magno Wiels  fundadó i Lider di Pueblo Soberano, dfm, komo “ Lider Emérito di Pueblo Soberano.”
E ofisialisashon di e akto aki lo ser anunsiá.

Direktiva i miembronan ta felisitá i deseá dr Whiteman  hopi forsa, sabiduria, kurashi pa yuda Kòrsou pasa dor di e tempunan difísil i lanta speransa bèk den e pueblo.

Direktiva di Pueblo Soberano

Rudley “Ray”  Eisden

Presidente

Advertisements

Skibi bo komentario / Opinion

This site uses Akismet to reduce spam. Learn how your comment data is processed.

%d bloggers like this: