Advertisements

Minister di Salú, Medio Ambiente i Naturalesa, Suzy Camelia-Römer ta lansa programa “Kunukito di Kas i di Bario” den bario Buena Vista. 

Minister di Salú, Medio Ambiente i Naturalesa, Suzy Camelia-Römer ta lansa programa “Kunukito di Kas i di Bario” den bario Buena Vista.    

 

WILLEMSTAD- Ku e meta pa mehorá salú di komunidat di Kòrsou i prevení malesanan kroniko, promové seguridat alimentisio i kombatí pobresa, Minister Camelia-Römer ta introdusí e programa “Kunukito di kas i di bario”. Primeramente e programa lo enfoká riba e kuater barionan di programa di urgensia ku ta Montaña, Otrobanda/Rif, Buena Vista i Barber, ku lo fungi komo barionan piloto.

Manera ta preskribí den e programa di gobernashon ta importante pa stimulá alimentashon sano/salú i garantisá seguridat alimentisio partikularmente bou di mucha i hobennan. Investigashon hasí pa entre otro Volksgezongheid Instituut Curacao (VIC) i Universidat di Kòrsou (Uoc) a konstatá ku den mayoria kaso, personanan ku sobre peso ta bin for di barionan di menos rekurso. E motibunan prinsipal ta, ku habitantenan di e barionan aki no ta sigui e norma basiko di alimentashon kual ta kome un minimó di 2 porshón di fruta i bèrdura pa dia. Mas aleu e investigashon a konstatá ku habitantenan di barionan di menos rekurso ta bebe demasiado bebida ku ta kontené hopi suku.

Netamente pa trese kambio positivo den e sistema di alimentashon, e programa aki tin komo meta, stimulá i siña habitantenan pa planta na kas i den bario produsiendo nan propio fruta i bèrdura. Mas aleu habitantenan lo haña konosementu kon pa kome salú i ekonomikamente. Tambe kon pa kushiná ku produktonan natural i for di nan propio kosecha. Plantamentu na kas no ta algu nobo. Hopi hende aki na Kòrsou a lanta den un kas kaminda ku den kurá tabatin diferente yerba, fruta i bèrdura. Ku tempu tur e tradishonnan aki tiki tiki a bai atras. Ku e programa nos ke rebibá e kustumbernan bèk den nos komunidat.

Lansamentu di e programa lo tuma lugá djabièrnè 12 di òktober na After School Academy (Child First Foundation) na Manhattanweg 6, Buena Vista di 6 or di atardi pa 8 or di anochi. Nos ta konta ku presensia di un i tur, espesialmente habitantenan di Buena Vista.

 

Advertisements
error: Content is protected !!
%d bloggers like this: