Advertisements

Karta di Parlamentario Curtley Obispo ku tópiko: Status di implementashon di rekomendashonnan di e rapòrt Komishon Evaluashon Corporate Governance Kòrsou.

Minister di Finansa

Señor Kenneth Gijsbertha

Pietermaai #17/Pietermaai 4-4A

 

Djaluna, 8 òktober 2018

 

Tópiko: Status di implementashon di rekomendashonnan di e rapòrt Komishon Evaluashon Corporate Governance Kòrsou.

 

Apresiabel señor Minister Kenneth Gijsbertha,

 

Reglanan prinsipal pa ku bon gobernashon di kompanianan anónimo i fundashonnan di Gobièrnu di Pais Kòrsou ta ankra entre otro den e lei di Corporate Governance, e dekreto nashonal Kódigo di Corporate Governance i tambe den Buki 2 di Kódigo Sivil. E lei i e kódigo di Corporate Governance di Pais Kòrsou ta aplikabel for di 10 òktober 2010 pa tur kompanianan anónimo i fundashonnan di Gobièrnu di Pais Kòrsou. Meta di e lei i e kódigo di Corporate Governance ta pa standarisá e struktura di bon gobernashon korporativo pa asina garantisá bon gobernashon, un bon espíritu empresarial inkluyendo gobernashon transparente, integridat i dunamentu na tempu di kuenta i rason dor di e kompanianan anónimo i fundashonnan di Gobièrnu di Pais Kòrsou.

Dor di diferente susesonan i tambe mal maneho den pasado na sierto kompanianan anónimo i fundashonnan di Gobièrnu di Pais Kòrsou, Gobièrnu di Kòrsou dia 28 novèmber 2013 a base di un dekreto nashonal a enkargá un komishon pa evaluá henter e lei i e kódigo di Corporate Governance. E Komishon Evaluashon Corporate Governance Kòrsou a raporta na desèmber 2015 diferente rekomendashonnan balioso pa drecha e Corporate Governance pa loke ta trata kompanianan anónimo i fundashonnan di Gobièrnu di Kòrsou.

Pues tin un sentido di urgensia pa adaptá e Lei i e Kódigo di Corporate Governance a base di (1) diferente susesonan i hechos den pasado, (2) e nesesidat di un mihó kumplimentu ku e lei i kódigo  di Corporate Governance i (3) tambe a base di e rekomendashonnan di e Komishon Evaluashon Corporate Governance Kòrsou.

Den kuadro di rekomendashonnan menshoná den kapítulo 9 i 10 di e rapòrt fecha Desèmber 2015 di e komishon i tambe den kuadro mi ròl di kontròl komo parlamentario mi ta aserká señor minister ku e siguiente preguntanan, hasiendo uso di mi derecho komo parlamentario pa hasi pregunta konforme artíkulo 96 di Reglamentu di Órden di Parlamento di Kòrsou: (1) Kua di e rekomendashonnan di e rapòrt Komishon Evaluashon Corporate Governance Kòrsou a wòrdu implementá promé ku 29 mei 2017? (2) Kua di e rekomendashonnan di e rapòrt Komishon Evaluashon Corporate Governance Kòrsou a wòrdu implementá despues di 29 mei 2017? (3) Kua ta minister su liña di tempu (tijdschema) pa implementá rekomendashonnan pendiente di e rapòrt Komishon Evaluashon Corporate Governance Kòrsou desèmber 2015?. Den e kuadro aki tambe kon lo bai revisá i fortifiká e lei di Corporate Governance di Kòrsou di tal manera ku e lei por kumpli ku e meta ku tabata tin destiná ku e instituto di SBTNO? Ki ta e liña di tempu  pa ku esaki?

Atentamente,

Curtley  Obispo

Parlamentario pa Kòrsou

PAR

 

Anekso:

  1. Dekreto Nashonal di 28 novèmber 2013 no. 13/2897 pa instalá e Komishon Evaluashon Corporate Governance Kòrsou.
  2. Rapòrt di e Komishon Evaluashon Corporate Governance Kòrsou Desèmber 2015.

Doc16127_375bV_15-16MinFin-VzSTN10mrt16VerzoekpresentatieEvaluatierapportCodeCorporateGovernance (1)

 

Advertisements

Skibi bo komentario / Opinion

This site uses Akismet to reduce spam. Learn how your comment data is processed.

%d bloggers like this: