Advertisements

Gilbert Doran – MFK: Komunikado Kupo di Trabou vs Enseñansa

Kupo di Trabou vs Enseñansa

 

Hóbennan ku terminá nan estudio no por drenta e proseso laboral Gobièrnu no ta kreando kuponan di trabou pa nos hóbennan i otro yunan di Kòrsou ku ta desempleá

 

Kòrsou, 7 di òktober 2018

 

Pa medio di e komunikado aki suskrito ke pidi atenshon pa lo siguiente.

Nos boka ta karga ku palabra nan bunita, ku mester konsientisá nos muchanan pa nan por alkansá den tur ramo di estudio lo máksimo pa Kòrsou por tin un futuro sigurá. Ku profeshonalnan bon kapasitá ku mester forma e base pa futuro di Kòrsou i pa desaroyo di nos nashon.

Pero lamentablemente nos tin ku tuma nota, ku durante di último añanan nos sifra di desempleo a sigui subi i ta yegando e sifra di 15%. Esaki tin komo konsekuensia ku hóbennan ku finalisá skol no ta haña oportunidat di drenta e proseso laboral pa nan por desaroyá nan mes pa den un futuro serkano karga responsabilidat den maneho di nos Kòrsou.

Esnan ku a studia na Kòrsou sea nan ta haña nan ta bandoná nos isla pa buska nan futuro na otro pais. Esnan ku a studia na Hulanda òf den region òf na Merka mayoria di nan ta skohe pa buska un futuro na e paisnan aki, pasombra manera ya nos a indiká no tin trabou pa nan na Kòrsou. Na Kòrsou tur dia tin pèrdida di kuponan di trabou, esaki tin komo konsekuensia ku nos mihó mentenan ta desaroyá nan mes pafó di Kòrsou i nos ta pèrdè nos hóbennan ku tin un bon konosementu.

Otro punto mas ku a hala nos atenshon ta e echo ku mayoria kompania i/òf instansia ta eksigí trahadó ku eksperensia i no ta krea e posibilidat pa e hóben hasi karera i forma su mes i asina haña eksperensia den e trabou ku e ta ehersé. E pregunta ta, si nunka no a duna oportunidat na e “young professional” kon e ta logra desaroyá su promé eksperensia ?

E situashon aki tin nos di MFK realmente preokupá i bo no ta tuma nota ku Minister di enseñansa sra. Marilyn Alcala-Walle i su Gobièrnu tin un maneho kaminda ta krea perspektiva pa nos hóbennan studiante pa futuro. A primintí ku lo a krea un relashon di trabou entre ministerio di enseñansa i sektor priva pa yega na un modelo kaminda e hóbennan por tin un garantia ku ora e kaba di studia nan por drenta e proseso laboral, pero esaki no ta tumando lugá i Kòrsou ta den un spiral ekonómiko negativo.

Banda di esei ta sumamente importante pa Gabinete Rhuggenaath a traha riba proyektonan pa no solamente aktivá bek nos ekonomia, pero pa bin ku proyektonan ku ta krea kupo di trabou pa por garantisá ku nos yunan ku bai studia afó i òf ta studiando akinan por haña trabou ora nan terminá. Ademas tambe pa aliviá e gran kantidat di yunan di tera ku den e último añanan aki a pèrdè trabou i a bandoná Kòrsou den un eksodo di yunan di tera ku ta bai for di Kòrsou pa buska un mihó futuro.

Gilbert “Gibi” Doran

Miembro di Parlamento

Frakshon di MFK

 

Advertisements

Skibi bo komentario / Opinion

This site uses Akismet to reduce spam. Learn how your comment data is processed.

%d bloggers like this: