Advertisements

Kombatimentu di sangura despues di áwaseru ta importante

Kombatimentu di sangura despues di áwaseru ta importante

Willemstad – Servisio di Salú Públiko di Kòrsou  (UO G&Gz ántes GGD) den kuadro di kombatimentu di sangura ta aksentuá riba e importansia pa eliminá lugánan di brui di sangura prinsipalmente despues di áwaseru.

Akshon ku kada hende mester tuma

Responsabilidat di kada suidadano ta pa eliminá fokonan kaminda sangura a òf ta pone webu. Mester kontrolá tur kaminda ku awa limpi i dushi a keda para. Tuma e siguiente akshonnan den i rondó di bo kas:

  • rekohé tur artefakto òf opheto ku por kontené awa. Por laba esakinan pasando un bròsh, skeiru òf e parti gròf di un spòns pa kita tur e webunan (punta pretunan) di sangura,
  • den kaso ku tin bichi òf larva i/ òf pupa den awa, tira esaki den mata pa asina nan muri,
  • chèk tur skòter bou di pòchinan di mata pa bichi/ larva di sangura,
  • kambia awa den glas òf pòchi tur siman i tambe pasa skeiru, bròsh òf parti gròf di spòns kita e webunan (punta pretunan) di sangura. Ta rekomendabel pa yena santu òf tera òf pone larvisida den e awa,
  • chèk bo renbak pa bichi/ larva di sangura den awa pará,
  • chèk barí i drùms di awa, tapa nan bon pa evitá ku sangura ta pone webu den nan i den e kaso aki tambe por tira larvisida den e awa,
  • warda tur artefakto pará den kurá manera tayer, drùms, barí, kosnan di plèstik, ko’i hunga di mucha, slòf di plèstik,
  • chèk hit di dak i limpia esaki kita blachinan.

 

Siklo di sangura

Sangura fuera di ta molestioso e ta un vektor ku ta transmití malesa. E famia di sangura Aedes por transmití entre otro e vírùs di Dengue, Chikungunya i Zika. P’esei ta importante pa sa kon e sangura su siklo di bida ta. E sangura muhé ta pika pa haña sanger pa produsí su webunan. Despues e sangura muhé ta buska awa pa pone e webunan aden. Esaki por ta fo’i un tapa di bòter di limonada te kualkier opheto òf lugá kaminda awa ta keda pará. Den un lapso di 5 pa 10 dia e webunan ta krese bira pupa, despues larva i despues sangura adulto. Un sangura por biba entre 4 pa 6 siman i un sangura muhé por pone te ku 400 webu den su bida.

Uzo di larvisida

Personanan ku ta fangu awa den barí òf drùms por buska larvisida grátis na UO G&Gz na Piscaderaweg 49 di djaluna pa djabièrnè entre 8’or di mainta pa 12’or di mèrdia. E larvisida ta AQUABAC 200® (pipita chikí maron) i e ta efektivo kontra e sanguranan mas importante na Kòrsou. E produkto no ta tóksiko pa e ser humano ni pa bestia pero ta konsehá pa sigui e instrukshon riba e etikèt. Den kaso ku tin awa pará den kurá òf áreanan grandi tambe por usa e larvisida. Pa mas informashon por tuma kontakto ku profeshonalnan di THZ- Vector Control & Surveillance na 432 2800 òf 462 2040.

Ta importante pa kada suidadano ta bon informá pa asina nos por kombatí e sangura ku ta transmití Dengue, Chikungunya i Zika.

 

Advertisements
error: Content is protected !!
%d bloggers like this: