Advertisements

Ahedresistanan ta sera ku viktoria

Ahedresistanan ta sera ku viktoria

 

E selekshon di Kòrsou a klousurá e Olimpiada di Ahedres na Batumi ku viktoria. E tim femenino a gana den buelta 11 ku skor di 3-1 di Senegal, miéntras ku e ahedresistanan maskulino a triunfá ku mesun skor riba Bahamas.

Den e último buelta dje Olimpiada di Ahedres e tim maskulino a presentá den otro konstelashon, esta kambiá. Wim Blijstra ku a hunga e kompetensia n’e promé tablero a haña liber i e hóben talentoso David Pietersz a bolbe haña chèns pa hunga.

Ursus van Bemmelen a hunga e biaha’ki n’e promé mesa i ku blanku ela gana di Polina Karelina di Bahamas. Ela tèrminá e kompetensia ku 4,5 punto for di 10 partido. Esaki ta produkto di tres viktoria, tres remise (empate) i kuater derota.

Na e di dos tablero Rurik Capella ku pretu a empatá ku Cecil Moncur. Esaki ta nifiká ku ela kaba ku 4 punto for di 10 partido: dos triunfo, kuater remise (empate) i tambe 4 wega pèrdí.

Jimmy Izijk ku blanku tambe a hunga remise ku Byron Small. Esaki tabata su di kuater empate na Batumi. Ela gana tres wega i pèrdè tambe tres. Pues ela tèrminá ku 5 punto for di 10 partido.

E hóben talento David Pietersz den e último buelta i ku pretu a logra su promé viktoria dje olimpiada. Esaki tabata kontra Francis Skinner di Bahamas. E ahedresista di Kòrsou a hunga 5 wega i a sera ku 1,5 punto, kua ta produkto di un triunfo, un remise i tres derota.

Blijstra ku no a hunga den e promé ni último buelta, a kaba e olimpiada ku 5 punto for di 9 partido. E hungadó prinsipal di Kòrsou a registrá kuater viktoria, hunga dos remise i pèrdè tres enkuentro.

E tim maskulino pues a kaba e Olimpiada di Ahedres ku 20 punto i a tèrminá na di 150 lugá den un fèlt di 184 pais. E ekipo Hulandes a okupá e di 40 lugá, miéntras ku Aruba a keda na di 164 puesto. China a gana e kompetensia maskulino dje Olimpiada di Ahedres, miéntras ku Merka a salí di dos i Rusia na di tres lugá.

Den e di 11 buelta dje kompetensia femenino Ailèn Mena n’e promé tablero a gana ku pretu di Lubov Leonidovna Bobrova di Senegal. Esaki tabata su di tres triunfo na Batumi. Mas aleu ela registrá sinku remise i a pèrdè 3 wega, ku ta bon pa 5,5 punto for di 11 enkuentro.

Na di dos tablero Mariana Sanchez a triunfá ku blanku riba  Binta Sy Mame. Ela kaba ku sinku viktoria i sinku derota, pues 5 punto for di 10 wega.

Arzy Zahia Salim-Moussa a pèrdè ku pretu na tablero 3 kontra di Mariama Sy. E ahedresista di Kòrsou no a logra gana niun di su 5 partidonan ku ela hunga.

Finalmente Seydi Salim-Moussa ku a hunga na mesa 4 ku blanku a gana di Fatou Diankha. Esaki tabata su di tres viktoria, miéntras ku ela empatá dos biaha i pèrdè sinku wega. Pues ela kaba ku 4 punto for di 10 enkuentro.

Taqesyah Marcos ku no a hunga den e di 11 buelta, a sera e olimpiada ku 2,5 punto for di 8 wega. Ela gana dos biaha i hunga un remise i pèrdè sinku partido.

E hóben tim femenino di Kòrsou a tèrminá ku 17 punto i na di 123 lugá den 151 pais. China a gana e kompetensia femenino aki, siguí na di dos puesto pa Ukraïna i na di tres lugá Georgia ku tabata e pais anfitrión. E ekipo Hulandes a okupá e di 26 puesto.

 

 

Advertisements

Skibi bo komentario / Opinion

This site uses Akismet to reduce spam. Learn how your comment data is processed.

%d bloggers like this: