Advertisements

Karta preguntanan: E Minister di MOU’s, Kon ta para ku e proyekto di Qcredits, Minister a krea kompetensha pa nos Banko di desaroyonan Korpodeko i OBNA ?

Na: Minister di Ekonomia i Turismo

Sr. Iven Steven Martina

PRESENTE

 

Kòrsou, 4 di òktober 2018

Tópiko: E Minister di MOU’s, Kon ta para ku e proyekto di Qcredits, Minister a krea kompetensha pa nos Banko di desaroyonan Korpodeko i OBNA ?

 

Manera frakshon di MFK a informá Minister kaba, ku nos lo atendé unu pa unu e tantísimo MOU nan ku minister Martina di MAN a firma, pero ketu bai tin un deterioro den ekonomia di Kòrsou. I nos no ta mirando ku Gabinete Rhuggenaath, forma dor di PAR, MAN i PIN, i kaminda  bo persona tin e kartera di Ekonomia, ta hasi mucho pa a aktivá nos ekonomia, tur indikashon ta ku nos lo sera aña 2018 ku un kontrakshon -1.0 % òf mas atrobe.

 

Awe nos kier pone lus riba e MOU ku Minister a firma ku QCREDITS. Nos ta konsiderá e forma aki di finansiamentu komo un sla bou di faha na institutonan finansiero manera KORPODEKO, OBNA i otro institutonan finansiero di Kòrsou. Frakshon di MFK ta haña ku e akshon aki di gobièrnu den fortifiká QCredits, ku esaki lo debilitá e bankonan di gobièrnu manera Korpodeko i OBNA. Den medionan di komunikashon a sali ku QCredits a kuminsá duna krédito na empresanan na Kòrsou, Aruba i Boneiru for di den aña 2015. Awor si esaki ta bèrdat, ta surgi e pregunta mesora, dikon awor ta gobièrnu di Kòrsou ta esun ku mester hinka fondonan públiko den e negoshi aki?

 

Hasiendo uso di artíkulo 96 di Reglamentu di Orden nos ta hasi minister Martina di MAN e siguiente preguntanan;

 

  1. Minister por informá Parlamento for di ki tempu QCredits a establesé riba suela di Kòrsou i for di kua fecha nan ta operando na i dunando fiansa na Kòrsou?

 

  1. Minister por informá for di kua fecha nan a haña suisidio/fondo di pueblo for di gobiernu di Kòrsou?

 

  1. Minister Martina por demonstrá Parlamento e dokumentonan ku ta proba ku e empresa/Fundashon aki a kumpli ku e “Subsidieverordening” pa por bini na remarke pa haña fondo di pueblo di Kòrsou?

 

  1. Minister por informá Parlamento for di kua pòst di presupuesto di Kòrsou a saka fondo pa inyektá den QCredits?

 

  1. Minister por informá Parlamento kuantu sèn di pueblo di Kòrsou minister a hinka den QCREDITS t na e alturanan aki i tambe kuantu fondo mas di pueblo di Kòrsou minister Martina di MAN tin pensa pa hinka den e empresa aki?

 

  1. Minister por informá Parlamento kua ta e opinion ekspresá pa tantu OBNA komo di KORPODEKO riba e asuntu aki di QCredits. Pues un opinion di e dos entidatnan aki di gobiernu, sin e opinion di minister?

 

  1. Minister por informá kon prosedura pa un di 2 direktor den Korpodeko a kana, ken a trek esaki, tabata tin solisitut habri si òf no?

 

  1. E Banko Korpodeko por karga 2 direktor ku e kompetensha krea awor di Qcredits?

 

  1. Ken a nombra e di 2 Direktor den Korpodeko i ken a bira e di 2 direktor finalmente?

 

  1. Si no tabata tin solisitut habri ta ken ta esnan ku a trek e proseso?

 

  1. Nos ke haña un lista di tur esnan ku ta nombra den direktiva di Korpodeko i pa kua sektor spesífiko nan ta representa, di OBNA tambe?

 

  1. Por informá nos tambe kon ta bayendo ku e banko di desaroyo Korpodeko?

 

  1. Por informá nos tambe kon ta bayendo ku e banko di desaroyo OBNA?

 

  1. Tambe si Qcredits ta un kompetensha pa Korpodeko i òf OBNA ku ta di Gobièrnu(nan)?

 

  1. Minister por informá hinter e konsepto di e empresa QCredits?

 

  1. Minister Martina por informá Parlamento si QCredits, mester a haña lisensia di Banko Sentral pa operá riba nos teritorio nashonal?

 

  1. Tambe nos kier sa si QCredits ta kai bou di supervishon di Banko Sentral?

 

Frakshon di MFK ta spera ku minister Martina tuma bon nota di e kontenido di e karta aki i kontestá nos preguntanan den e tempu stipulá konforme nos palabrashonnan entre Parlamento i Gobièrnu.

 

Atentamente,

Charles Cooper

Miembro di Parlamento

Frakshon di MFK

Na: Presidente di Parlamento di Kòrsou

Sr. W. Millerson

Wilhelminaplein # 4

PRESENTE

Kòrsou, 4 di òktober 2018

Apresiabel Sr. Millerson,

Pa medio di e karta aki, hasiendo uso di artíkulo 96 di reglamentu di órden

di Parlamento, mi ke pidi bo persona pa dirigí e karta athunto na Minister Ivan Steven Martina enkargá ku Ekonomia i Turismo, ku preguntanan ku mi persona ta hasi na e minister konserní.

 

Danki pa e koperashon.

Atentamente,

Charles Cooper

Miembro di Parlamento

Frakshon di MFK

 

 

Advertisements
error: Content is protected !!
%d bloggers like this: