Advertisements

Elsa Rozendal di MAN: Nò ta sigui kòrta den presupuesto di enseñansa 

Elsa Rozendal di MAN: Nò ta sigui kòrta den presupuesto di enseñansa 

E situashon finansiero di nos pais p’e último añanan ta prekario. Esaki a pone ku Gobièrnunan di turno i esun aktual a haña nan ta kuminsá kòrta den gastunan i presupuesto. Tambe den gastunan i presupuesto di enseñansa. Konsekuentemente nos ta haña nos ku e kuenta presentá awe ku hopi direktivanan i kabesnan di skol tin ku drei e depchi dos te asta tres biaha pa por kubri ku gastunan diario.

E fenomeno aki no ta kontribuí na mantené un kalidat haltu di nos enseñansa i tampoko un bon funshonamentu pa maestro i alumno.
Pa frakshon di MAN, enseñansa ta un di e pilarnan pa forma un sosiedat di hendenan sivilisá, ku kapasidat pa por analisá i pensa krítiko, ku por aportá positivamente na nos komunidat ni maske kon fèrfelu e situashon ta.

Segun Rozendal, si nos ta konsiente di e echo aki, ta nifiká ku nos mester yuist invertí mas sèn den enseñansa en bes di kòrta. Pa e motibu aki tambe riba inisiativa di Frakshon di MAN, parlamento a pasa un moshon pa no kòrta den presupuesto di enseñansa entrante 2019.
Den 2018, nos pais ta konfrontando retonan, manera Hospital Nobo, Refineria, Insel Air i situashon di Venezuela, ku a afektá presupuesto di nos pais drástikamente.

Pero, si den e pais aki, nos a yega na un punto ku ni e gastunan básiko, pa entre otro enseñansa, nos no por kubri, nos tin un problema serio.
P’esei komo parlamentario i representante di pueblo, Rozendal ta hasi un apelashon riba minister di Enseñansa pa hasi tur loke ta posibel pa garantisá ku e fondonan ta disponibel pa enseñansa.
Tambe Rozendal ta urgi minister pa kuminsá ku un analisis profundo pa sa ku e fondonan disponibel ta keda realmente husá pa nan meta i ku tur skol na Kòrsou ta haña mesun trato, esta un “Gelijke bekostiging” i un “Toereikende bekostiging”.

Den e kuadro aki Rozendal a hasi algun pregunta na e minister.

  1. Minister por bisa Parlamento si tur skol na Kòrsou, segun lei, ta haña subsidio basá riba e prinsipio di “Gelijke bekostiging” i un “Toereikende bekostiging”?
  2. Minister por bisa Parlamento ki ehersisionan minister a hasi pa husa fondonan disponibel mas efisiente posibel?
  3. Minister por bisa Parlamento si Minister ta bai buska mas fondo pa enseñansa? Entre otro di Union Oropeo òf Hulanda?
  4. Minister por bisa Parlamento si minister a eliminá “waste” den enseñansa p’asina fondonan ku a bini liber, keda destiná pa otro gastunan den enseñansa?
  5. Minister por bisa Parlamento si minister a yega di konsiderá hasi un apelashon na komunidat, mayor, sektor privá, èts pa duna un man pa logra huntu un enseñansa optimal i di kalidat?

Advertisements
error: Content is protected !!
%d bloggers like this: