Advertisements

Ahedresistanan ta empatá ku Qatar

Ahedresistanan ta empatá ku Qatar

 

E tim maskulino di Kòrsou ayera, djarason 3 di oktober 2018, a empatá 2-2 ku Qatar den di nuebe buelta dje Olimpiada di Ahedres na Batumi, Georgia. E tim femenino a pèrdè pèrtá di Surnam: 2,5-1,5.

Ta pa di dos biaha durante e Olimpiada di Ahedres ku e tim maskulino ta empatá. Den di shete buelta tambe Kòrsou a tabla 2-2 ku Bermuda. E ahedresistanan mas aleu a logra 2 triunfo i pèrdè 6 biaha.

Den e seri di kuater partido kontra di Qatar tabata Jimmy Izijk ku a pone Kòrsou dilanti. E no a duna su kontrinkante niun chèns i registrá un triunfo lihé. E yu di Kòrsou ku pretu a superá Khalifa Abdrabo Al Qahtani. Esaki tabata su di tres viktoria kontra tambe tres derota i dos tabla (remise) bon pa 4 punto for di 8 partido.

Rurik Capella tambe a gana di forma konvinsente di su kontrinkante Al Shamari Ghanem. Nan a hunga e apertura Siciliano kaminda ku e ahedresista di Kòrsou a ehekutá un plan di atake ganando dos peon di su kontrinkante pa despues e ofresé un dje peonnan bèk pa bai wega final ganá.

Ursus van Bemmelen ku pretu tambe a sali mihó posishoná for dje apertura i asta a kome un peon, pero no dje forma korekto. Esaki a pone ku su oponente Al Hor Salih a haña chèns i espasio pa harma su wega via dje liña habrí H i forsá e ahedresista di Kòrsou pa entregá na di 37 movida.

Wim Blijstra ayera a sufri inesperadamente su di dos derota siguí, despues ku e tabata invikto den 6 partido. Husein Aziz Nezad ku pretu a hunga un wega kaminda ela mantené konstantemente chènsnan pa remise te ora ku a presentá kambio di piesa. Aki nan e tabatin mihó posishon den wega final i ku movidanan solido a obligá Blijstra pa entregá na di 82 movida.

E hóben tim femenino despues dje konvinsente viktoria riba Ghana djamars, ayera a pèrdè pèrtá di Surnam den buelta 9: 2,5-1,5.

Ailèn Mena ku pretu a sufri n’e promé tablero un derota na man di Rosangela dos Ramos. Esaki ta apenas su di dos derota, miéntras ku ela gana 2 partido i tabla den 5 wega, ku ta bon pa 4,5 punto den 9 partido.

Mariana Sanchez ku blanku a gana di Kaithlyn Tjong Tjin Joe i tin asina awor 4 triunfo i 5 derota. Esaki ta nifiká ku e hungadó number 2 di Kòrsou tin 4 punto for di 9 partido.

Taqesyah Marcos tambe a pèrdè den di nuebe buelta. Catherine Kaslan tabata esun ku a gan’é. Esaki ta di 4 derota pa e ahedresista di Kòrsou ku tin 2 viktoria i 1 tabla, bon pa 2,5 punto for di 7 partido.

Finalmente Seydi Salim-Moussa ku a hunga ku blanku a logra un tabla importante kontra Alexandra Kaslan. Ku e remise aki awor e tin 3 punto for di 8 partido: 2 viktoria, 2 tabla i 4 derota.

 

Advertisements
error: Content is protected !!
%d bloggers like this: