Advertisements

Gisette Seferina (PAR):  nos ta trahando trabou di pi’e palu?? A YEGA ORA PA INTRODUSÍ UN LEI DI SUSHI.

Gisette Seferina (PAR):  nos ta trahando trabou di pi’e palu??

A YEGA ORA PA INTRODUSÍ UN LEI DI SUSHI.

 

WILLEMSTAD- Resientemente boluntarionan na Korsou a partisipá ku masha entusiasmo na e dia mundial di limpiesa, World Cleanup Day, ku a kuminsá na 2008 komo un inisiativa nashonal na e pais Estonia den Europa Oriental. E inisiativa aki entretantu a globalisá i na Korsou e aña aki, boluntarionan ku a partisipá a rekohé mas ku un mion kilo di sushi fo’i areanan públiko riba nos isla. Lastimamente, ya kaba por tuma nota ku habitantenan a kuminsa tira sushi riba kaya atrobe. Definitivamente a yega momento pa introdusí un Lei di Sushi.   

Gisette Seferina (PAR) ta elogiá e esfuerso grandi di e boluntarionan ku a demonstrá ku tin un kantidat konsiderable di siudadano ku ta dispuesto pa invertí tempu i plaka pa logra un ambiente mas salú i sigur pa nos pueblo i bishitantenan di nos isla. Na e mes momentu e parlamentario ta remarká ku e tendensia di susha areanan públiko ta sigui krese, i esaki según Seferina ta un prueba más ku mester bini ku un instrumento mas pisá pa atendé ku esnan ku ta tira sushi riba kaya. E parlamentario ta boga pa introdusí un ordenansa nashonal pa atendé ku e problema serio aki.

“Ta inkreibel ku te ainda tin hende riba nos isla ku ta pensa ku ta permití pa hisa sushi benta tur kaminda pa loko. Aunke semper tin espasio pa mas akshon di konsientisashon dirigí na e pueblo, ami ta kere a yega e momentu pa Gobiernu tuma posishon ankrá riba lei pa ku e problema aki i tuma pasonan pa kriminalisá tiramentu di sushi riba kaya,” asina Sra. Seferina ta enfatisá. E parlamentario ta trahando riba un proposishon di lei ku e ta spera di por entregá promé ku fin di aña. Segun Seferina, e konsekuensianan di tiramentu di sushi riba kaya i otro sitionan no destiná pa esei tin konsekuensia negativo i tin biaha asta desastroso pa salubridat públiko, seguridat den barionan, desaroyo turístiko, i promoshon di un medioambiente i naturalesa sano pa habitante i bishitante. Ademas, ta sientífikmente probá ku un pais sushi ta fomentá komportashon antisosial, inkluso ilegalidat i krimen mas pisá.

“Korsou no por permití su mes sigui den e direkshon robes aki. A yega ora pa kombatí  e komportashon inakseptabel aki pa medio di lei”asina Seferina a deklará.

Advertisements
error: Content is protected !!
%d bloggers like this: