Advertisements

Di 3 viktoria pa ahedresistanan femenino

Di 3 viktoria pa ahedresistanan femenino

 

E hóben tim femenino di Kòrsou ayera, djamars 2 di oktober 2018, a logra su di tres triunfo durante e Olimpiada di Ahedres na Batumi, Georgia. E ahedresistanan a gana Ghana ku skor di 3,5-0,5. E tim maskulino a pèrdè den e di 8 buelta’ki ku skor di 3,5-0,5 di Lichtenstein, kaminda ku Wim Blijsta tambe a sufri su promé derota.

Despues ku djaluna e tim hóbennan femenino a pèrdè kontra ku skor di 3,5-0,5 dje fuerte ekipo di Nicaragua, ayera djamars nan a gana ku mesun skor di Ghana.

Den di 8 buelta Ailèn Mena a logra su di dos triunfo na Batumi. E biaha’ki ela superá ku blanku Angela Naa Amerley Ayiku. Te ku awor e ahedresista di Kòrsou a empatá 5 biaha i pèrdè un wega. E derota’ki tabata den promé buelta kontra di Paula Elizabeth Paredes Bustamante di Perú. Mena ta lider dje tim femenino ku 4,5 punto for di 8 partido.

Mariana Sanchez na su turno a gana su di tres wega durante e olimpiada. Ela derotá Maud Benson. E ahedresista ku ta hunga na tablero number 2 tin awor 3 punto for di 8 enkuentro.

Na di tres tablero Taqesyah Marcos ku blanku a empatá ku Tobi Felix. Esaki ta su promé tabla (remise) durante e Olimpiada di Ahedres. Ela gana te ku awor dos partido i tin 2,5 punto for di 6 partido.

Seydi Salim-Moussa a registrá tambe un viktoria. Ela logra esaki ku pretu kontra di Christiana Naa Merley Ashley. Esaki tambe ta su di dos wega ganá, miéntras ku ela pèrdè na kuater okashon i pues tin tambe 2,5 punto for di 7 partido.

Kontrali na e ahedreistanan femenino, esnan maskulino tabatin un mal dia. Nan a kai vensí ku skor di 3,5-0,5 kontra di Lichtenstein. Despues di shete buelta invikto, Wim Blijstra a pèrdè su promé partido. Esaki tabata kontra Renato Frick. Awor e tin 5 punto for di 7 wega: 4 triunfo, 2 remise i 1 derota.

Rurik Capella a pèrdè ku blanki na tablero number 2 kontra Marcel Mannhart. Esaki ta su di kuater partido ku e ta pèrdè, miéntras ku ela gana un wega i empatá dos biaha: 2 punto for di 7 enkuentro.

Jimmy Izijk a registrá ayera e úniko remise kontra Ghana pa Kòrsou. Ela empatá ku pretu kontra di Andras Guller. Awor e tin 3 punto for di tambe 7 partido: 2 triunfo, 2 remise i 2 derota.

Despues ku ela registrá un bunita remise den di shete buelta, ayera den di 8 buelta e talentoso ahedresista David Pietersz a pèrdè. Ela sufri e derota aki na man di Dejan Jelic.

 

Riba e foto: Ailèn Mena.

Advertisements
error: Content is protected !!
%d bloggers like this: