Advertisements

Ta nos mes ta chòk e sistema di reunion

Segun Stephen Walroud:

“Ta nos mes ta chòk e sistema di reunion”

Parlamentario Stephen Walroud awe mainta durante di reunion di Komishon sentral a bisa ku e ta hasi un outo kritiká pa ku parlamento mes, ku ta nos mes komo parlamentario ta chòk e sistema, komo ku ta pidi reunion di karakter públiko pa chin chan un kos.

Parlamentario Walroud ta reakshon riba e opservashon di un par di parlamentario ku ta lamentá ku e reunion di awe ta trata un punto di agènda ku a ser pidí for di mart 2018. Segun reglamentu di òrdu un reunion mester wòrdu yamá den máksimo 14 dia ku el a ser pidi.

“Nos mes ta chòk e sistema, dor di pidi reunion di karakter públiko muchu frekuente kaminda sierto tópikonan ku ta ser pidí pa reunion por wòrdu solushoná pa medio di teknologia moderno manera dor di bèl , manda un WhatsApp i/òf mail e minister, pero tambe por pidi u reunion di komishon fiho, kaminda den un seno ménos formal por diskutí e mesun tópiko i haña tur kontesta riba preguntanan di karakter di urgensia.

Pero si nos mes komo parlamentario keda pidi reunion di karakter públiko un tras di  otro, nos mes ta krea un retraso. Ta kon e ora ei por bin reklamá e mesun retraso?

Tene kuenta ku kada reunion públiko ku ser yama ta kosta sèn, tempu i èkstra seguridat. Tambe e minister konserní,kolaboradornan i tim di maneho di e ministerio pa hopi ora mester ta presente den sala di reunion unda ta evitá ku esakinan por traha pa pueblo su nesesidatnan

Finalmente Parlamentario Walroud ta sugirí  na presidente di parlamento pa ku e retraso di reunionnan pidí, ku kisas ta un idea pa pone meskos ku Parlamento Hulandes reunion públiko ku 5 pa 6 punto di agènda, anto pa kada punto 5 minüt di disertashon pa kada frakshon en bes di 20 minüt pa kada parlamentario. Di e forma aki por atendé ku e retraso i por reuní riba e tópikonan di un manera mas efisiente.

 

Advertisements
error: Content is protected !!
%d bloggers like this: