Advertisements

RÈSPÈT PA DIGNIDAT DI HENDE. Matrimonio, e base pa un famia i sosiedat segun lei natural.

RÈSPÈT PA DIGNIDAT DI HENDE.

Matrimonio, e base pa un famia i sosiedat segun lei natural.

 

Obispado di Willemstad a bin ta tuma nota ku un biaha mas den nos komunidat ta biba e preokupashon enkuanto “matrimonio” di personanan di e mesun sekso.

Den kuadro di esaki Iglesia ke bolbe yega serka tur su fielnan kristian katóliko i no katóliko den e momentunan aki pa bolbe sigurá su posishon. Ta importante pa nos indiká ku den Katisashi di Iglesia Katóliko, pero tambe den diferente otro dokumentunan, Iglesia Katóliko ta presentá seksualidat humano komo un regalo maravioso di Dios pa hende i na mes tempu komo un gran responsabilidat. Alabes Iglesia a rechasá i ta sigui rechasá tur tipo di deskriminashon kontra tur persona sin importá nan kredo, rasa, koló, sekso i nashonalidat. P’esei nos ke bolbe enfatisá ku pa loke ta trata nos rumannan ku tin un orientashon homoseksual esaki no ta un eksklushon. Nos tur ta kriaturanan seksual, luchando duru ku seksualidat – tendensianan, deseonan, soledat, orientashon i identidat propio. Personanan homoseksual ta meresé nos rèspèt, komprendementu, amistat i hustisia. Nan no mester sufri di kualkier prehuisio kontra nan derechonan básiko humano, nan mester haña un ròl aktivo den komunidat i den Iglesia.

Alabes Iglesia tin e responsabilidat pa den tur momentu sigui trese e Palabra di Dios, su mandamentunan ku ta duna direkshon na un bida di libertat i felisidat berdadero.Ta riba esaki e enseñansanan di Iglesia ta ser basá. Nos ke ta e bos di Señor ku tambe ke salbaguardiá su derechi di guia tur su yunan den e direkshon korekto. P’esei e enseñansa di Iglesia, risibí di Dios mes ta ku “Matrimonio ta un union stabil entre un hòmber i un muhé, kende ta establesé un kombenio di bida largu. Pa naturalesa e union aki ta pa nan mes bon i e prokreashon i edukashon di yunan.”(wak Katisashi di Iglesia katóliko 1601). I ta for di e punto di bista aki ku Iglesia katóliko ta basa su posishon enkuanto matrimonio. Matrimonio no ta un kombenio di amor so, pero e ta trese ku n’e aspektonan ku ta hasi ku e mester ta entre un hòmber i un muhé. I nos ta di opinion ku e úniko ku por kambia e definishon aki ta Dios.

Aparte di e diskushon tokante matrimonio entre personanan di e mesun sekso, Iglesia ta rekonosé ku nos pais ta pasando tambe den diferente otro situashon di preokupashon ku ta toka e pueblo su bienestar general. Nos tin situashon preokupante pa ku famianan ku pa motibu di desempleo no por proveé pa nan kas di famia, muchanan ku ta bai skol ku hamber, situashon di pobresa ku ta kresiendo, hóbennan ku ta kai for di enseñansa i ta sin trabou, kriminalidat ku ta oumentá, etc. Tur e tipo di situashonnan aki meresé atenshon igual prinsipalmente mirando ku nan ta toka e bienestar general di nos pueblo. P’esei sin sera wowo pa tur e otro situashonnan aki ku na opinion di Iglesia ta di sumo importansha Iglesia ta lansa e pregunta: Diskushon riba matrimonio di e mesun sekso ta un prioridat pa nos pueblo awor aki?

Iglesia, siguiendo e guia di papa Fransisco ku ta invitá pa praktiká “e kultura di enkuentro”, ta boga pa nos hiba un diálogo habrí, ku rèspèt pa opinion di tur hende, kaminda ta tene kuenta ku e opinion di e gran mayoria di e pueblo aki ku ta kristian.

Obispado sigur ke ta partísipe den tal diálogo si esaki ta un prioridat,  pa huntu, bou di e guia di Spiritu Santu, nos tuma desishonnan korekto i ku ta na bienestar di e pueblo en general.

Obispado di Willemstad, 1 òktober 2018

Advertisements
error: Content is protected !!
%d bloggers like this: