Advertisements

E edifisio di Hospital Nobo no ta sali mas karu ku suma original presupuestá

E edifisio di Hospital Nobo no ta sali mas karu ku suma original presupuestá

WILLEMSTAD – E Konstrukshon di Hospital Nobo Otrobanda mes no ta kosta mas ku e kasi 422 mion florin ku ta e suma originalmente presupuestá. Asina direktor di HNO Transitie & Exploitatie, Gilbert Martina a enfatisá djaluna atardi na momentu ku ela duna transparensia total pa ku tur e invershonan nesesario. Martina a rekordá ku e desishon pa muda e sitio tereno di eks-Amstel pa Colon Otrobanda tabatin konsekuensia logístiko i finansiero supstansial pa varios faseta rondó di e konstrukshon di hòspital nobo. For di e momentu ku gobiernu a tuma e desishon pa muda konstrukshon di e hòspital di Amstel pa Otrobanda tabata konosí ku lo bini gastunan adishonal supstansial aserka.

Gilbert Martina a referí na e hecho ku na Otrobanda no tabata disponé di un tereno kla pa ubiká e hospital ariba manera si tabata e kaso na tereno di eks-Amstel.  E mudansa pa Otrobanda a kondusí na kompra di Colon pa 18 mion, kambionan na J. Hamelberg ku a suma kasi 15 mion, e plan di mudansa di Cath Lab i Botika di Sehos pa un otro sitio pa despues basha edifisionnan den kua esakinan tabata ubiká huntu ku mortuario riba tereno di Sehos abou, a kosta 14 mion. Tur esaki a trese tardansa kune pa kua e konstruktor Ballast Nedam kontraktualmente por a entregá ‘claims’ kontra e partido ku a dun’é enkargo di konstrukshon. E suma di claims entregá ta totalisá total di 37 mion florin. Korte di hustisia lo tin ku duna un veredikto final riba esaki. E kasonan aki ta trese gastunan di assistensia hurídiko supstansial kune kalkulá na 10 mion.

Na desèmbér 2015 SONA ta informá gobiernu ku e gastunan adishonal riba e kasi 422 mion original ta suma 72 mion florin. Fin di 2016 den e rapòrt “Tussentijdse Evaluatie HNO” ta indiká ku kontralí na e kalkulashon di SONA, e gastunan adishonal lo surpasá 100 mion florin. Na aprel 2017 Minister di Salubridat, Sisline Girigoria, a entregá e rapòrt aki na parlamento. Riba  23 di febrüari 2018, Minister Suzy Camelia-Römer (GMN) ta informá Staten ku abase di un prome kalkulashon di su ekspertonan mester tene kuenta ku e suma adishonal rekerí lo ta mínimo 125 mion.

Na luna di Yüni 2018 ta bira konosí ku gobiernu lo no kumpli ku e promesa hasí den pasado pa duna  dispensashon di impuesto di importashon riba material i ekiponan médiko i tambe algun otro aspektonan. Ku e desishon aki e proyekto di HNO ta keda kargá ku un suma adishonal di 27 mion.  Resientemente Hospital Nobo Otrobanda a traha un asina yamá ‘explotatie model’ aktualisá ku ta duna un bista hopi mas éksakto di e suma total adishonal nesesario. Den e ‘exploitatie model’ a  inkluí tambe tur gastunan di transishon pa un suma di 40 mion i tambe un suma pa ‘werk kapitaal” di 20 mion pa na momentu ku e hospital nobo bira operashonal e no kuminsa ku un situashon finansiero manera nos aktual hòspital ta eksperensia.

Saliendo for di e punto di maneho di riesgo i bon gobernashon korporativo HNO su ‘exploitatie model’ aktualisá ta sali for di un asina yamá ‘worst case scenario’ kaminda e total di sumanan adishonal a keda kalkulá na un máksimo di 200 mion. Un asina yama “worst case scenario” ta nifiká ku no ta probabel ku lo surpasá e suma total aki. Mas aleu Gilbert Martina a duna di konose ku gerensia di e Hospital Nobo Otrobanda ta optimista ku pronto ta keda kla ku e finansiamentu riba merkado lokal privá.

Tur esaki no ta nifiká sin mas ku e preis di kuido ta oumentá. Un hospital moderno i un konsepto nobo di traha ta ofresé oportunidatnan pa redusí gastunan den nos kadena di kuido i kura na Kòrsou. Pa e motibu aki Hospital Nobo Otrobanda ta trahando den estrecho koperashon ku Ministerio di GMN i otro instansianan pa yega na un aserkamentu nobo pa ku prevenshon, kuido i kura riba nos isla. A presentá e ‘exploitatie model’ na Gobièrnu, Taskforce Financieel Beheer, CFT i institutonan finansiero ku ta demonstrá ku den tempu lo por karga e finansiamentu adishonal aki dor di un hospital nobo ku lo ta muchu mas efisiente ku esun aktual.

E ‘exploitatie model’ ta aktualmente bou di skrutinio di SOAB. Gerensia di Hospital Nobo Otrobanda ta trahando di forma diligente pa mas pronto posibel durante 2019 entregá pueblo di Kòrsou su hospital nobo di kua nos por ta orguyoso di dje. Na final Gilbert Martina a hasi un apelashon na miembronan di prensa i komunidat di Kòrsou kompletu pa ban adoptá un ‘minsdet’ di positivismo pa huntu kue un rumbo ku lo trese nos éksito i felisidat.

 

Advertisements

Skibi bo komentario / Opinion

This site uses Akismet to reduce spam. Learn how your comment data is processed.

%d bloggers like this: