Advertisements

Dia di Outonomia den esfera di responsibilidat siviko

Dia di Outonomia den esfera di responsibilidat siviko

 

Willemstad – Dia 10 di òktober ta dekretá komo Dia di Outonomia di Kòrsou. E aña akí Gobièrnu di Kòrsou, aparte di halsa e selebrashon di e fecha importante akí, tambe ta pone atenshon na e responsabilidat síviko ku e konsepto di outonomia ta trese kuné pa siudadanonan di Kòrsou. Dia di Outonomia, aparte di ta un fecha históriko, ta un oportunidat pa nos para ketu na e aspektonan positivo, kreativo, produktivo i di inklushon ku ta uni nos komo pueblo i ademas ta reflehá e responsabilidat propio pa nos dushi pais Kòrsou.

P’esei mes e aña aki Gobièrnu di Kòrsou a opta pa un selebrashon diferente kaminda durante henter e Dia di Outonomia, ta enfoká riba vários evento ku ta enfatisá kon nos, komo pueblo, ta karga nos responsabilidat propio den diferente forma. Den oranan di mainta ta kuminsá ku algun aktvidat ku ta trata e tema di salú i moveshon. Esaki ta tuma lugá den sentro di siudat. Mas despues den mainta ta sigui ku aktividatnan simultáneo den algun bario kaminda e barionan ta haña oportunidat pa presentá nan idea pa un obra di arte públiko ku ta duna refleho di e konsepto di outonomia den nan mes bario.

Despues den oranan di atardi tin diferente aktividat den sentro di siudat repartí entre Otrobanda i Punda. Na Otrobanda tin e evento titulá ‘Kòrsou ta Produsí’ pa medio di e Marshe Sosial Ekonómiko (BETH). Na Punda tin un Marshe di Informashon titulá ‘Kòrsou ta Informá’ kaminda kada ministerio i algun organisashon ku tin di haber ku Gobièrnu, tin un stènt di informashon pa duna splikashon tokante nan trabou i proyektonan. Esaki ta sosodé riba dia 10 di òktober 2018 entre 3’or di atardi pa 7’or di anochi, riba e área patras di Wilhelminaplein (dilanti di Ministerio di Hustisia).

Ta klousurá e Dia di Outonomia ku e aktividat titulá ‘Kòrsou ta Reflehá i Selebrá’ ku ta tuma lugá na vários sitio den Punda. Akinan, via di debate i formanan artístiko i kreativo, ta interkambiá riba e aspektonan konstitushonal i históriko di e tema Outonomia. Un parti hopi interesante ta un podia habrí na Plasa Jojo Corea, kaminda tur artista i esnan ku aspirashon artistiko por bin presentá kiko nan tin aden. Lo tin un seremonia ofisial di parti di Gobièrnu i na final ta selebrá ku músika pa un i tur por gosa.

Advertisements
error: Content is protected !!
%d bloggers like this: