Advertisements

Simposio Prevenshon, Seguridat i Abo na kaminda pa 2019, Aña di Prevenshon

Simposio Prevenshon, Seguridat i Abo na kaminda pa 2019, Aña di Prevenshon

Ya pa algun tempu Minister di Hustisia Quincy Girigorie ta enfatisando e importansia di e trayekto di prevenshon di krímen den e kadena hudisial. Banda di represhon, prevenshon tambe ta un método efektivo pa logra baha kriminalidat. Den e kuadro aki Minister di Hustisia, Quincy Girigorie ta invitá pueblo di Kòrsou na e Simposio Hustisia Seguridat i Abo ku lo tuma lugá riba dianan 4,5 i 6 di òktober próksimo. E simposio aki ta unu di e diferente proyektonan di prevenshon di krímen ku Ministerio di Hustisia ta trahando riba dje pa asina stimulá esfuersonan kombiná di Gobièrnu, Sektor Privá i Komunidat.

Durante di e simposio komunidat por partisipá na charla i seshonnan informativo riba tereno di prevenshon di kriminalidat. Di e forma ei kada partisipante por amplia no solamente su konosementu pero tambe lo haña instrumentonan ku ta yuda limitá su chèns di bira un víktima di violensia i krímen. Ademas lo tin temanan pa e haña guia kon pa minimalisá e konsekuensianan di esaki. Huntu ku esaki lo tin tambe temanan ku ta empoderá e partisipante pa rekonosé i guia personanan en partikular e hóben ku ta den e grupo riesgo pa kai den kriminalidat.

Aña di prevenshon

Djaweps dia 4 di òktober, lo tin e apertura ofisial di e simposio. Durante di e apertura, Minister Girigorie lo deklará di forma ofisial aña 2019, komo Aña di Prevenshon. Banda di esaki e ‘keynote speech’ lo ta na enkargo di un kriminólogo spesialisá riba e tema di kriminialidat bou di hóbennan i formashon di gèng, señor Wendell Wallace, di Trinidad &Tobago. Ademas lo tin un charla di señor Reinald Curiel, CCO di Ennia, kende lo elaborá riba e ròl di sektor privá i e koperashon ku komunidat den kombatimentu di krímen. Djabièrnè dia 5 di òktober, lo tin tres charla/tayer siguí pa un debate ku diferente gruponan di komunidat. Minister di Hustisia tambe lo forma parti di e debate aki.

Mas ku 25 seshon di informashon

Djasabra dia 6 di òktober, for di mainta 9 or’ te ku atardi 5 or’, lo tin un kantidat grandi di charla i tayer. Esakinan aki lo tin un durashon di 1 ora. Kada ora lo tin kuater charla ku ta tuma lugá na mes momentu. Pues durante di henter e simposio lo tin un kantidat di mas ku 25 seshon di informashon. E seshonnan lo ta na enkargo di tantu organisashonnan di Ministerio di Hustisia komo di algun empresa ku ta ofresé produkto i servisio ku ta kontribuí den prevenshon di krímen.

Kadená hudisial ta informá

Lo trata diferente tópiko interesante durante di e wikènt informativo aki. Asina lo tin un charla di Gezinsvoogdij Instelling (GVI) ku e tema: ‘Ami so no por, kiko Awor?’. Tambe lo tin charla di Wardakosta ku lo papia tokante seguridat riba laman. Mas aleu Kuerpo Polisial lo duna charlanan tokante kon e siudadano por protehá su mes, su famia i su propiedat. Algun tópiko ku nan lo trata ta: ‘Kon pa reakshoná den kaso di un atrako’ i ‘Kon evitá kiebro den kas i den outo’. Lo bai tin tambe vários charla spesial dirihí riba mayornan. Stichting Ambulante Justitiele Jeugdzorg (AJJC) lo bai trata e tema: ‘Tep pa e edukadó: Kon pa dil ku komportashon desviante’.  Mas aleu lo tin seshonnan di organisashonnan di e kadena hudisial manera Ministerio Públiko, Toelatingsorganisatie Curaçao, Stichting Slachtofferhulp i Voogdijraad. Un tópiko hopi aktual ku Ministerio Públiko lo elaborá riba dje ta Violensha Relashonal. Brandweer Curaçao, komo parti di Ministerio di Hustisia, tambe lo ta na enkargo di algun seshon. Otro tema interesante lo ta e trayekto di resosialiashon ku ta tumando lugá den Sentro di  Detenshon i Korekshon Kòrsou. Resosialisashon tambe ta un medida di prevenshon pero riba gruponan ku ya a kai den man di Hustisia.

Sosten di sektor privá

Banda di organisashonnan di e kadena hudisial, lo tin empresanan ku a djòin e kousa i ku lo bin pa duna informashon tokante diferente produkto i servisionan ku nan ta ofresé ku ta kontribuí den prevenshon i seguridat. Indel NV lo duna splikashon tokante sistemanan di kamara i sistemanan pa detekshon di kandela. Tambe lo tin e kompania Surveillance Specialist ku tambe lo duna splikashon amplio di produktonan pa yuda protehá propiedat. Otro kompanianan ku lo partisipá ta Forensic Caribbean, CFS Solutions i Ennia.

Grátis, pero mester registrá

Partisipashon na e seshonnan ta grátis pa pueblo di Kòrsou en general. Sinembargo, sí ta pidi pa registrá adelantá – por hasi  riba marshediprevenshon@gmail.com, via die pagína di Facebook Prevenshon, Seguridat i Abo òf ku un app riba 5293011. Por haña e programa di e simposio tantu den korantnan lokal komo riba e página di Facebook di Prevenshon Seguridat i Abo, Ministerio di Hustisia i di organisashonnan partisipante. Pa mas informashon tokante e simposio por manda un imeil na marshediprevenshon@gmail.com.

Minister di Hustisia, Quincy Girigorie ta invitá pueblo di Kòrsou pa akudí na e simposio aki i pa huntu ban forma e base pa un Kòrsou mas trankil i sigur.

Advertisements
error: Content is protected !!
%d bloggers like this: