Advertisements

Minister Marilyn Alcalá-Wallé: ban radia “Union den Diversidat”

Minister Marilyn Alcalá-Wallé: ban radia “Union den Diversidat”

WILLEMSTAD – Durante Siman di Kultura ku ta tras di lomba, Minister di Enseñansa, Siensia, Kultura i Deporte, sra. drs. Marilyn Alcalá-Wallé a bishitá diferente organisashon i institutonan pa asina konbibá e Siman di Kultura huntu ku nan.

Minister Marilyn Alcalá-Wallé ta suprayá ku ta importante pa nos tei semper pa otro: den bon i den momentonan difisil.

Segun Minister Marilyn Alcalá-Wallé: “huntu nos tin ku sostené i edifiká otro, apesar di nos diferensianan. Ta importante pa nos ta un komunidat uní ku ta radia “Union den Diversidat”.

Pa e motibu aki a dediká atenshon na diferente gruponan di nos komunidat durante e Siman di Kultura.

Minister Marilyn Alcalá-Wallé a bishitá entre otro Sint Elisabeth Hospital pa dediká atenshon na esnan ku ta sufri di kebrante di salú. Aki a sera konosí ku algun miembro di gerente di hospital i a risibí un rekorido den hospital i papia tokante e historia i balor kultural di e edifisio. Sint Elisabeth Hospital ta aksentuá e balor di historia tangibel riku ku komo Pais nos mester ta orguyoso di dje.

Alabes Minister Marilyn Alcalá-Wallé a sera konosí ku diferente miembro di e personal di hospital i deseanan un dushi Siman di Kultura.

Por lo demas Minister Marilyn Alcalá-Wallé a bishitá e hóbennan di G.O.G. ku mayoria bes komunidat ta lubidá riba dje. Personal di G.O.G ta hasiendo un tremendo trabou ku e hóbennan aki, kaminda a dediká henter e siman ku ta tras di lomba, na nos Kultura. Pa medio di formashon artístiko (e.o. músika i arte), ta hasi traspaso di konosementu kultural i krea konosementu i konsientisashon di balor di nos kultura bou di nos hóbennan.

Tambe Minister Marilyn Alcalá-Wallé a bishitá Sentro di Detenshon i Korekshon Kòrsou ku tambe a dediká atenshon na Siman di Kultura. Pa medio di ekspreshon kultural i músika, detenidonan ta keda formá ku konosementu i práktikanan di nos Kultura.

Totolika tambe a risibí bishita di Minister Marilyn Alcalá -Wallé. Den un ambiente ameno Minister a baila i dibertí huntu ku e hóbennan, riba músika folklóriko pa asina duna e señal ku nos tin ku hiba un maneho di inklushon den nos sosiedat.

Un dokumentario di Pedro Luis Brión a keda resientemente publiká pa asina trese informashon i konsientisashon tokante un parti kultural fundamental di nos historia. Den e kuadro di sosten, Minister Marilyn Alcalá-Wallé a duna atenshon na esaki.

I pa no lubida riba konservashon di nos musiká di Serenada, Minister Marilyn Alcalá-Wallé a sostené e peligroso la musikal Yamada!

Pa kloursurá e Siman di Kultura, Minister Marilyn Alcalá-Wallé a hiba un palabra di gradisimentu durante e aktividat di klousura, ku a tuma lugá djadumingu 30 di sèptèmber 2018 na Zona Kultural.

Minister Marilyn Alcalá-Wallé ta gradisí tur instansia i organisashon ku ta promové nos kultura i Union den Diversidat.

Riba potrèt por mira:
 -Minister Marilyn Alcalá-Wallé huntu ku su kolaborador sra. Herta Balentina-Parabirsing na SEHOS ku gerente: direktor di asuntunan general; sr. Anthon Casperson, sr. Elvis Thodé; direktor finansiero di asuntonan ekonómiko i sra. Margie Balentina; hefe di departamento di dialisa.
 -Minister Marilyn Alcalá-Wallé den ambiente kultural ku hóbennan di Totolika.
 -Minister Marilyn Alcalá-Wallé ku su kolaboradornan sra. Herta Balentina-Parabirsing i sra. Nidia Rosaria-Wallé na Sentro di Detenshon i Korekshon Kòrsou.
 -Minister Marilyn Alcalá-Wallé durante di Klousura di Siman di Kutura.
Advertisements
error: Content is protected !!
%d bloggers like this: