Advertisements

Karta na Presidente di Staten i Karta na Minister di VVRP Sra. Zita Jesus-Leitu riba benta/privatisashon di UTS (MB 18Sept2018 Athunto i Moshon 9 Dec 2014)

2 karta di frakshon di MFK atraves di sr. Gerrit F. Schotte lider di frakshon di MFK den Parlamento:

  1. Karta ku nunka no a yega Parlamento nos kier sa di Presidente di Staten kon bin esaki no a yega den nos man,Tópiko: Ministeriele Beschikking 18 sèptèmber 2018 (MB) relashoná ku benta di UTS (Privatisashon)

 

  1. Tópiko: Moshon di 9 di desèmber 2014, ta bisa reportá bek na Staten riba e plan pa buska un partner stratégiko, awor ta kla pa firma ku un kompania ku ta provedor di internèt sin informá nada na Staten, pa asina e bira “Gedane zaken nemen geen keer” ?

 

 

Na : Presidente di Parlamento di Kòrsou

Sr. W. Millerson

Wilhelminaplein

Presente

 

Kòrsou, 29 di sèptèmber 2018

Tópiko: Ministeriele Beschikking 18 sèptèmber 2018 (MB) relashoná ku benta di UTS (Privatisashon)

 

Sr. Presidente,

 

Na nòmber di Frakshon di MFK nos ta aserká bo ku e siguiente inkietut;

 

Den nos brivenbùs nos a haña un MB fechá 18 di sèptèmber 2018, firmá pa Minister Zita Jesus-Leito, den kual e ta lanta un komishon pa bende akshonnan di UTS (mira athunto).

 

Nos lo kier konfirmá serka bo persona algun inkietut ku nos tin;

 

  1. Greffie di Parlamento a risibí kopia di e MB aki manera ta wòrdu menshoná den e MB?

 

  1. Si e kontesta di pregunta 1 ta afirmativo, por informá frakshon di MFK kua fecha a risibí esaki i dikon e no a wòrdu publiká riba RIS?

 

  1. Si kontesta na pregunta 1 ta negativo, frakshon di MFK ta sugirí bo persona pa pone Minister Jesus-Leito na altura ku un MB ku a wòrdu firma for di 18 di september 2018, no a yega Parlamento te ku awe. Esaki no ta akseptabel ku despues di mas ku 10 dia ku a firma e MB ku Parlamento no a risibí esaki. Pero ya e MB ta riba kaya i manera ya indiká Parlamento mes no ta dispone di dje, manera ke laga aparentá ku menshon di Staten riba dje.

 

Pues nos ta spera ku lo bo sa di aklará nos inkietut ku urgensia, mirando e embergadura ku benta (Privatisashon) di propiedatnan di pueblo por trese kuné. Kòrda e desenlase pa ku e benta di Kas di Kòrsou na Den Haag kual a bai kompletamente robes.

 

Atentamente,

 

Na nòmber di Frakshon di MFK,

 

 


Gerrit Schotte

Lider di Frakshon di MFK

 

=============================

 

Na Minister di Tráfiko, Transporte i Planifikashon Urbano

Sra. Zita Jesus-Leito

Seru di Arrarat

Presente

 

Willemstad, 29 di september 2018

Tópiko: Moshon di 9 di desèmber 2014, ta bisa reportá bek na Staten riba e plan pa buska un partner stratégiko, awor ta kla pa firma ku un kompania ku ta provedor di internèt sin informá nada na Staten, pa asina e bira “Gedane zaken nemen geen keer” ?

 

Honorabel  Sra. Minister Jesus-Leito,

 

Frakshon di MFK a keda asombrá ku un “Ministerieële Beschikking” (MB) ku a kai den nos brivenbùs, indikando ku konseho di Minister a bai di akuerdo ku un proposishon di bo persona pa lanta un komishon pa privatisashon di UTS i no pa buska un partner stratégiko.

 

Den un moshon di Parlamento di Kòrsou fechá 9 di Desèmber 2014, Parlamento di Kòrsou a bisa gobièrnu pa hasi lo siguiente;

 

Ta disidí:

 

Pa instruí gerensia i RvC di UTS atraves di gobièrnu di Kòrsou komo akshonista pa inisiá e proseso pa;

 

  1. Buska un partner stratégiko fuerte riba tereno di telekomunikashon pa UTS por
  2. Garantisá invershonnan nesesario i mantenshon di teknologia i
  3. Kalidat di servisio di telekomunikashon na bienestar di desaroyo ekonómiko i sosial di Kòrsou i
  4. Reportá esaki na Parlamento mas pronto posibel.

 

Ora nos lesa e karta di CFT na minister Gijsbertha i Presidente di Parlamento fechá 25 di Sèptèmber 2018 na paginá 6, CFT ta bisa lo siguiente di UTS;

 

“Voor wat betreft de dividendvordering op UTS verklaart de minister dat de regering van oordeel is dat er geen voorziening getroffen hoeft te worden. Ter onderbouwing heeft de minister een aandeelhoudersbesluit van 11 september jl. en brief van de UTS directie van 12 september jl. toegevoegd. Daarmee wordt een nieuwe invulling gegeven aan de vordering van ANG 37 miljoen van het Land op UTS. Na vereiste formele handelingen gaat UTS volgens het besluit van de aandeelhouders over tot het reserveren van boven-nominaal gestort kapitaal”

 

 

“De uitkering hiervan kan echter vanwege gebrek aan voldoende liquide middelen niet dit of volgend jaar worden gedaan en wordt gekoppeld aan de verkoop van aandelen aan een derde partij. Het land verkoopt hiermee zijn bezit, wat effect heeft op het vermogen. Hoe deze transactie de betaalbaarstelling van de vordering zal beïnvloeden blijft ook met dit besluit onzeker. Gezien het voorwaardelijke en daarmee hoog onzekere karakter van de uitbetaling van de vordering blijft het Cft bij zijn standpunt dat hiervoor een voorziening getroffen dient te worden”

 

“De directie van UTS zegt middels haar brief van 12 september jl. toe om vooruitlopend op een vervreemding van de aandelen door het Land, een voorschot van ANG 3 miljoen uit te betalen aan Curaçao en Sint Maarten tezamen. Wanneer voor de ANG 2,6 miljoen (aandeel Curaçao) te ontvangen ‘vooruitbetaling’ een concrete datum kan worden overeengekomen, ziet het Cft dit deel van de vordering wel als voldoende zeker. Voor het overige deel van ANG 34,4 miljoen blijft de aanbeveling staan om een voorziening te treffen ten laste van de gewone dienst en als dekking hiervoor alternatieve maatregelen te nemen”

 

For di e karta di CFT nos di Parlamento tin ku haña di kompronde ku Gabinete Rhuggenaath ta den proseso pa bende akshonnan di UTS pa haña sèn pa tapa buraku den presupuesto di Kòrsou, algu similar ku a hasi ku lantamentu di un Consultancy Bedrijf den HNO pa asina por fia atraves di un “onderhandse lening” 200 mion florin pa kaba Hospital nobo, loke lo trese e kosto total di HNO na alrededor di 700 mion florin.

 

Hasiendo uso di artikulo 96 di Reglamentu di Orden nos ta hasi minister

Jesus-Leito e siguiente preguntanan;

 

  1. Minister ta na altura di e kontenido di e Moshon di Parlamento fechá 9 di desèmber 2014?

 

  1. Minister ta na altura ku e moshon ta papia di;

 

  • Reportá bèk na Staten;
  • Buska Partner Stratégiko pa fortifiká UTS, no pa paga debe ni pa paga Gobiernu;
  • Garantisá invershon nesesario den teknologia;
  • Garantisá kalidat di servisio;

 

E moshon NO ta indiká, pa akshonista manda pidi CEO/Direktor pa privatisá UTS pa asina gobiernu haña sèn pa paga debe. No ta asina ta atendé ku propiedat di pueblo di Kòrsou. Tristu ta ku esaki ta sosodé sin outorisashon di representante di pueblo, kual ta Parlamento di Kòrsou.

 

 

 

  1. Minister por informá Parlamento di Kòrsou ku si ta bèrdat ku minister ta bezig ta bendiendo UTS of parti di UTS?

 

  1. Minister por informá Parlamento kua ta e akshonnan ku e komishon menshoná den e “Ministeriele Beschikking” (MB) di 18 september 2018 a hasi kaba?

 

  1. Dikon e MB ta bisa ku un kopia tin ku bin pa Parlamento i te awe mèrdia 29 di september 2018, ainda nos no a risibí esaki na Parlamento, Minister a manda e MB pa Parlamento si of no?

 

  1. Si kontesta na pregunta 5 ta negativo, ta hopi robes pa bisa for di 18 di september 2018 ku e MB lo bin Parlamento i tòg a retené esaki, Minister, ta krea un impreshon robes, ku ta mustra un intenshon maligno, kua ta e motibu ku e MB no a yega Parlamento?

 

  1. Kua ta e motibu ku Konseho di Minister a kambia for di buska un Partner Stratégiko i bin ku e formulá nobo di duna òrdu pa kuminsá bende akshonnan di UTS pa kapitalisá i asina akshonista por saka sèn for di UTS?

 

  1. Minister por informá Parlamento basá riba kua outoridat minister ta bendiendo UTS of parti di UTS, debí ku ta Parlamento so ta outorisá pa aprobá benta di propiedat di pueblo di Kòrsou i loke ta pasando awor aki no ta e deseo ku Parlamento a ekspresá den e moshon di 9 di desèmber 2014?

 

  1. Si e kontesta na pregunta # 6 ta bai ta moshon di 9 desèmber 2014 tene kuenta ku tin mas moshon aprobá ku mayoria ku Minister no ta ehekutando entre otro moshon di smart zoning?

 

  1. Minister por informá Parlamento si minister ta den negosiashon ku un tersera pa kumpra akshonnan di UTS?

 

  1. Si e kontesta ta afirmativo minister por informá kua ta e kompania aki i si ta un kompania establesé na Kòrsou ku ta provedor di internèt?

 

  1. Si kontesta na pregunta 10 i 11 ta afirmativo Minister por informá Parlamento dikon Minister no a reportá bek na Parlamento manera e moshon ta indiká i ya kaba ta den negosiashonnan ku un tersera i te ku kisas lo firma pronto?

 

  1. Minister por informá Parlamento si a envolví e sindikato SITCOM den e trayekto aki, di bende propiedat di pueblo pa e sindikato por sali na interes di nan trahadónan?

 

 

 

  1. Ta pago di “duurtetoeslag” i dividendo a hinka den e suma ku lo bai bende e akshonnan pa asina kumpli ku e òrdu ku CFT a duna na Minister di Finansa?

 

  1. A kue partner stratégiko tradusí i hasi esaki privatisashon manera tempu partido PAR a lanta STIP pa bende kompanianan di Gobièrnu?
  2. Kon nos tin ku wak e komishon i òrdu ku nan a haña algu similar na STIP?

 

  1. Unda den akuerdo di Gobernashon a indiká ku ta bai kuminsa privatisá?

 

  1. Ningun kaminda na mundu ora un kompania di estado no por paga dividendo, e akshonista ta obligá e kompania pa hasi un fiansa pa paga debe of dividendo na su akshonista. Esaki ta e forma ku gabinete Rhuggenaath kier implementá “Good Corporate Governance”?

 

For di ora bo drenta den un aventura di bende akshon di un kompania di estado ta debí ku e kompania tin problema. Ta di lamentá ku nunka a laga ARC drenta den UTS pa sa e orígen real di e problemanan den UTS. Den e kaso aki akshonista (lesa gobiernu di Kòrsou) tin problema finansiero anto ta obligá un benta pa asina por cash out pa paga debe. Den e kaso aki, segun nos di MFK ta tur dos motibu ariba menshoná ta forma parti di e desishon “adhoc” aki.

 

Frakshon di MFK ta spera ku minister Jesus-Leito ta tuma bon nota di e kontenido di e karta aki i kontestá nos preguntanan ku karakter di urgensia mirando e situashon penoso, ku nos di Parlamento mester a tende berdatnan via di un karta di CFT ku propiedat di pueblo ta na benta pa yuda tapa burakunan krea dor di un maneho finansiero kompletamente robes.

 

Atentamente,

 

 


Gerrit F. Schotte

Lider di Frakshon di MFK

 

Advertisements
error: Content is protected !!
%d bloggers like this: