Advertisements

Ahedresistanan ta gana di dos seri

Ahedresistanan ta gana di dos seri

 

Kòrsou a gana su di dos seri di weganan riba Olimpiada di Ahedres na Batumi, Georgia. E tim femenino ayera, djabièrnè 28 di sèptèmber 2018, a superá Barbados ku skor di 3-1, miéntras ku e ahedresistanan maskulino a derotá Guam ku 2,5-1,5.

 

Ku e viktoria di ayera Kòrsou tin awor 2 viktoria i 3 derota. E ekipo femenino tin 7 punto den 5 buelta, miéntras ku esun maskulino tin 9,5 punto den tambe 5 buelta.

 

E buelta number 5 a kuminsá di forma dramátiko pa e tim maskulino ora ku inesperadamente Rurik Capella a pèrdè su wega, despues di tabata ganá. Ela sali hopi bon fo’i e apertura ingles ku su kontrinkante Rogelio Orio di Guam a presentá ku n’e. E ahedresista di Kòrsou den wega medio sinembargo a faya i despues a skohe pa un variante di kuá su oponente a probechá mihó i gana e partido.

 

Na tablero 2 tabata Ursus van Bemmelen ku a hasi e skor 1-1 ora ku ela gana di Elias Tirador. Despues Wim Blijstra né promé tablero a hunga remise kontra Elmer Prudente. Esaki a nifiká ku e último partido na tablero number 4 a bira desisivo.

 

Na mesa 4 Kòrsou a presentá atrobe ku Jimmy Izijk, despues ku den buelta 4 ela haña liber/deskanso. E yu di Kòrsou tabatin ku gana òf sikiera tablá pa asina skapa su tim di otro derota. E no a defroudá su koleganan i den un wega sólido a gana di Almer Santos i asina yuda Kòrsou na e triunfo: 2,5-1,5.

 

Den grupo femenino e kuater ahedresistanan a sòru pa no pèrdè kontra di Barbados. Nan a registrá 2 triunfo i 2 empate. Na promé tablero Ailèn Mena a tabla ku blanku kontra Julissa Figueroa. Mariana Sanchez na di dos mesa i ku pretu a gana di Vanessa Greenidge. Na tablero number 3 Taqesyah Marcos ku blanku tambe a gana di Gabriela Cumberbatch. Finalmente na último mesa Seydi Salim-Moussa a tabla ku Donna Murray.

 

Foto:

Jimmy Izijk ku un bunita viktoria ayera a pone ku Kòrsou a logra su di dos viktoria na Batumi, kaminda aktualmente tin e Olimpiada di Ahedres.

Advertisements
error: Content is protected !!
%d bloggers like this: