Advertisements

Selikor ta klousurá Sèptèmber luna di limpiesa

Selikor ta klousurá Sèptèmber luna di limpiesa

 

Sèptèmber ta e luna den kual hopi di nos ta para ketu riba e importansia di limpiesa. Durante e luna di Sèptèmber Selikor tabata di bishita na algun skol di Fundeshi ku e meta pa konsientisá i hisa e grado di responsabilidat mas tantu serka nos muchanan pa yuda tene nos isla limpi. Despues di un presentashon amplio di representantenan di Selikor, alumnonan di siklo 1 a risibí un regalu den forma di un buki di klùr ku diferente pintura di e maskota Grunchi.

Selikor a konkluí e luna di limpiesa ku vários akshon di limpiesa den diferente área di Kòrsou. E akshon di limpiesa rònt Kòrsou, organisá pa Curaçao Clean Up a generá un total di kasi 932 mil ton di shushi. Esaki ta bisa hopi riba e grado di shushedat riba nos isla. Por a nota tur tipo di shushi i sigur un gran kantidat di shushi gròf. Selikor ta rekordá komunidat ku pa shushi gròf Selikor ta ofresé un bes pa luna servisio grátis. Un bes pa siman Selikor ta pasa rekohé shushi di kas den tur bario i si e habitante ta deseá esaki e mes tambe por pasa na Transbordo Koraal Specht òf na e kompleho na Malpais pa deshasí di su shushi di kas i shushi di kurá. Pa shushi di konstrukshon Selikor ta brinda e posibilidat pa trese esaki grátis na Malpais. Na Kaya di Medioambiente na Malpais por pasa i deshasí grátis di diferente tipo di shushi ku por resiklá. Esaki ta nifiká ku no tin niun motibu pa benta shushi kaminda esaki no ta pèrmití pa lei.

Un danki na tur ku a kontribuí di un forma òf otro na e diferente akshonnan di limpiesa durante Sèptèmber luna di limpiesa. Danki speshal na e inisiadónan di Curaçao World Clean Up Day kual tabata un kontribushon di ministerio di SOAW i GMN i diferente fundashon i kompania, entre otro Curaçao Cares, Curaçao Clean Up, Clean Caribbean Coalition i Green Force.

Selikor ta sigui apelá na komunidat di Kòrsou den su totalidat pa yuda mantené nan bario limpi. Si nos ta konsiderá ku e pais aki ta di nos, nos tin e responsabilidat patriótiko i síviko pa mantené limpi.

 

Advertisements

Skibi bo komentario / Opinion

This site uses Akismet to reduce spam. Learn how your comment data is processed.

%d bloggers like this: