Advertisements

Falta di konosementu di e diesdos (12) miembronan di Parlamento ku ta sostené gabinete Rhuggenaath ta bolbe manifestá su mes durante reunion den sala di Parlamento

Falta di konosementu di e diesdos (12) miembronan di Parlamento ku ta sostené gabinete Rhuggenaath ta bolbe manifestá su mes durante reunion den sala di Parlamento

Ta di lamentá ku diesdos (12) Parlamentarionan ku ta sostené e gabinete aktual no konosé i tampoko kier siña kon nos sistema gubernamental ta hinka den otro, pa asina debatenan den Parlamento por ta mas efektivo i konforme responsabilidat di e Minister ku ta den Parlamento pa trata e punto di agènda ku mester wòrdu trata.

Awe durante di reunion di komishon sentral di Parlamento tabata presente Minister di Hustisia i Parlamento mester a debatí ku e Minister riba e punto di agènda;

“Deliberashon ku Minister di Hustisia enkuanto maneho di gobièrnu pa loke ta trata personanan indokumentá den kuadro di leinan di nos pais, tratadonan internashonal, derechonan humano, relashon eksterior i e realidat sosio ekonómiko di nos pais”

Korektamente na komienso di e reunion frakshon di MFK a indiká na presidente di Parlamento ku MFK ta konstatá den e formulashon di e punto di agènda ku tin puntonan/tópiko, ku no ta kai bou di responsabilidat di Minister di Hustisia i ku su persona no tin outoridat pa papia, ni kontesta preguntanan riba e tópikonan aki.

Manera ta bon konosé pa tur yu di Kòrsou, tratadonan Internashonal, derechonan humano i relashon eksterior ta un responsabilidat ku konforme nos Areglo di Estado ta kai bou di responsabilidat di gobièrnu di Reino, pa ta mas eksakto Minister di Relashonnan Eksterior.

Na Kòrsou minister Presidente, ku ta responsabel pa e kartera di asuntunan general ta esun ku tin kontakto pa medio di “Bureau Buitenlandse Betrekkingen” ku e departamentonan konserní na Hulanda i ta informá Minister Presidente riba e diferente aspektonan di e tres puntonan ariba menshoná.

Kon por ta posibel ku apesar ku frakshon di MFK ta indiká na Presidente di Parlamento ku Minister di Hustisia no por deliberá ni kontesta preguntanan di Parlamento riba tratadonan Internashonal, derechonan humano i relashon eksterior debí ku esaki nan to kai bou di su responsabilidat.

Presidente di Parlamento ku tambe ta keda demonstrá su inkapasidat pa dirigí Parlamento ta pone e argumento válido aki trese dilanti dor di frakshon di MFK na votashon i e diesdos Parlamentarionan ku ta sosten e gabinete aktual ta vota pro pa tòg deliberá ku Minister di Hustisia riba puntonan ku no ta kai bou di su responsabilidat.

Frakshon di MFK ta lamentá kon nos Parlamento ta keda wòrdu afektá pa e diesdos (12) miembronan ku ta sostené e gabinete aktual. Kada be di di nobo na ta mustra nan falta di konosementu i ta trata na mata e mensahero na lugá di apliká loke ta korekto i ku ta ankra den nos sistema gubernamental i Areglo di Estado pa asina nos por tin debate nan na nivel i ku e Ministernan responsabel pa e puntonan di agènda ku ta wòrdu trata den Parlamento.

 

Kòrsou, 27 di sèptèmber 2018,

 

Gilmar “Pik” Pisas

Miembro di Parlamento

Frakshon di MFK

Advertisements
error: Content is protected !!
%d bloggers like this: