Advertisements

Ahedresistanan ta bolbe pèrdè

Ahedresistanan ta bolbe pèrdè

 

Despues ku tantu e tim femenino komo esun maskulino djarason a logra nan promé viktoria den Olimpiada di Ahedres, ayera djaweps -27 di sèptèmber- tur dos ekipo a pèrdè. E ahedresistanan maskulino sinembargo tabata hopi serka atrobe di un triunfo.

E ekipo maskulino despues di a gana Antigua & Barbuda djarason ku skor di 4-0, a kuminsá ku animo haltu na e di kuater buelta dje Olimpiada di Ahedres na Batumi, Georgia. Nan kontrinkante tabata Surnam.

Na e promé tablero Wim Blijstra kasi a logra su di 3 triunfo den 3 wega, pero e no a haña e movida ganadó den e wega di defensa Hulandes ku a aparesé riba mesa. Su kontrinkante Roger Matoewi a probechá di esaki i a sá di saka un empate fo’i dje.

Rurik Capella na tablero 3 tambe tabatin blanku i a skohe pa hunga e apertura Benoni. Ela avansá ku su peon f i pone e sentro di peon di Casanova Romario Sanches bou di preshon. Su kontrinkante sinembargo a neutralisá e avanse i preshon aki i via di ripitishon di movida a kumbiní tabla.

Na mesa number 2 Ursus van Bemmelen ku pretu a skohe pa defensia Siciliano komo apertura. Su oponente Viresh Giasi inteligentemente a kontestá ku e variante Alapin. Niun di dos hungadó no a saka ventaha di posishon i a kumbiní pa parti e punto.

Finalmente e talentoso hóben David Pietersz a hunga na tablero 4 pa Kòrsou kontra di Suradj Hanoeman. Ku pretu ela skohe pa defensa Nimzo-Indio, pero su kontrinkante a sorprend’é ku e variante Kmoch. E yu di Kòrsou a kai atras den posishon i finalmente na di 42 movida ela entregá despues ku su oponente tabatin atake ku menasa di mat riba dje.

Ku e resultadonan ei, e tim maskulino di Kòrsou a pèrdè ku 1,5 – 2,5 di Surnam. Awe djabièrnè Guam ta e kontrinkante.

Den grupo femenino Ailèn Mena a bolbe registrá ‘remise’ (tabla) na promé tablero. E biaha’ki kontra di Helen Milligan di New Zealand. Ta su di dos empate, miéntras ku ela gana un biaha tambe i pues tin 2 punto for di 4 partido na Batumi.

E otro tres ahedresistanan di Kòrsou a pèrdè nan wega. Mariana Sanchez a sufri un derota na tablero 2 kontra di Vyanla M Punsalan. Taqesyah Marcos na mesa number 3 tabatin ku rekonosé ku Nicole Shu Yu Qin ta mihó ku ne. I finalmente Seydi Salim-Moussa a pèrdè kontra Joy Shu Yan Qin.

Awe djabièrnè e ahedresistanan femenino di Kòrsou ta hunga den buelta number 5 kontra di Barbados.

 

 

Advertisements
error: Content is protected !!
%d bloggers like this: