Advertisements

Promé triunfo ahedresistanan

Promé triunfo ahedresistanan

 

Kòrsou a logra ayera, djarason 26 di sèptèmber, su promé viktoria riba Olimpiada di Ahedres na Batumi, Georgia. E tim femenino a gana den di 3 buelta ku skor di 3-1 di Seychellen, miéntras ku esun maskulino a superá Antigua & Barbuda ku 4-0.

Despues di un promé buelta desastroso, e ahedresistanan lokal a demonstrá den di dos buelta ku nan por kompetí riba plano internashonal ora ku nan a akumulá nan promé puntonan. Den di tres buelta nan a hunga tremendo ganando konvinsente di e kontrinkantenan.

Den e kompetensia femenino Ailèn Mena na promé tablero i ku pretu a gana di Roysha Mougal di Seychellen. Na tablero number dos Mariana Sanchez ku blanku tambe a kanta viktoria, derotando di Liza Adeline. Arzy Zahia Salim-Moussa a hasi tur esfuerso n’e di tres tablero, pero a pèrdè kontra Dericka Figaro. Seydi Salim-Moussa na di kuater tablero a superá Bernardette Claudia Contoret.

Ku e triunfo di 3-1 riba Seychellen ku ta un isla i archipel na Afrika pegá ku Madagaskar, Kòrsou awor tin 3,5 punto. E ahedresistanan femenino ta hunga awe, djaweps 27 di sèptèmber, kontra New Zealand. E pais aki den promé buelta a pèrdè 4-0 di India, despues gana ku 4-0 di Lesotho i ayera a sufri un derota di 3,5 – 0,5 kontra Moldavia.

E tim maskulino tambe tabata den gran forma den di tres buelta. Kapitan David Curiel a manten’é e mesun konstelashon di buelta number 2 i e ahedresistanan a logra un triunfá di forma konvinsente riba Antigua & Barbuda.

E promé ku a gana su partido tabata Ursus van Bemmelen na di dos tablero, kaminda ku sin pèrdè muchu tempu ela superá Jerry Aska. Ela hasi esaki kibrando fasil den e asina yamá defensa Chigorin di su kontrinkante pa despues asta gana piesa.

Na di tres tablero Rurik Capella a sorprendé su kontrinkante Hannibal Fleming ku un variashon no usual den e defensa Modernu. Aki e ahedresista di Kòrsou a tuma e inisiativa desaroyando un atake mortal riba ala di Rei ku menasa real di hake mate. Promé ku kòntròl rutinario di oloshi su oponente a entregá e wega.

Na tablero number 1 tambe Wim Blijstra tabatin un dia interesante. Ela hunga e asina yamá variante Najdorf den defensa Siciliano. Su kontrinkante Matthew Bailey no tabata sa kon atendé ku esaki i tambe a pèrdè su partido.

Jimmy Izijk na di 4 tablero a desplegá un partido stratégiko kontra di Andre Warner. E ahedresista di Antigua & Barbuda a kuminsá ku e defensa yamá ‘Konings-Indisch’ riba kua Izijk a kontestá ku e sistema Fianchetto. Via dje sistema aki e hungadó di Kòrsou a traha trankil riba su posishon i despues asta gana piesa desisivo pa e viktoria.

Ku e triunfo di 4-0 riba Antigua & Barbuda, e tim maskulino awor tin 5,5 punto. Kòrsou awe djaweps ta hunga kontra di Surnam ku den e promé buelta a pèrdè ku 3,5 – 0,5 di Serbia. Den di dos buelta Surnam a gana 3-1 di Guyana i ayera ela pèrdè ku 3,5 – 0,5 di Luxumburgo.

 

Advertisements
error: Content is protected !!
%d bloggers like this: