Advertisements

Kenneth Pieter number 10 riba lista di Partido Inovashon Nashonal

Kenneth Pieter number 10 riba lista di Partido Inovashon Nashonal

Kòrsou: por mihó! Parlamentario Dos Santos tirando ku sifra i komparando un preis di kamber di un hotel ku kamber di un hospital, algu ku ta totalmente for di tur lógika.

Kòrsou, 27 di Sèptèmber 2018,

Willemstad – Konstrukshon di un hospital nobo pa Kòrsou tabata sumamente nesesario. Amigu i enemigu, tur ta di akuerdo ku e hospital aktual ya no ta kumpli mas ku e nesesidatnan di nos komunidat pa risibí kuido na e nivel ku nos pueblo mester di dje. Un lo a poné na De Savaan, otro na tereno di Amstel, pero finalmente a konstruyé den kurason di Otrobanda. Un hospital den Otrobanda sigur lo kontribuí positivamente na area di Otrobanda. E hospital tei!

Nos por a tuma nota di e reunion ku a tuma lugá resientemente den Parlamentu, kaminda nos representantenan mester ta hasiendo nan trabou di kontrolá i vigilá ku Gobièrnu ta kumpli ku su tarea.

Lamentablemente mi mester konstata ku opositornan politiko no a hasi uso di e posibilidat pa uni ku e minister pa yega na e berdat di kiko tur a tuma lugá na komienso, durante i proksimamente entrega di e proyekto. Pues pa sa kiko a sosode ku e fondonan ku a keda invertí den e konstrukshon di Nos Hospital Nobo.

E aktual Minister di Salubridat, Medio Ambiente i Naturalesa Suzy Camelia-Römer ta esun ku a bati bel for di kuminsamentu, na momentu ku e la asumí e funshon di Minister di e kartera importante aki, ku mester bin investigashon rondó di fondonan usá den e proyekto di HNO.

Tur hende por korda kuantu problema Minister Camelia-Römer a bin topa den e maneho di e proyekto di Hospital, i e entidat ku tabata responsabel pa konstruí e hospital nobo, tardansa i te hasta menasa ku lo a trese paro den e proyekto i di claimnan mionario kontra di pais.

E manera transparente ku Minister Camelia-Römer a atende e situashon rondó di e konstrukshon i traspaso di nos hospital, ta konta ku aprobashon kompleto di partido PIN.
E proyekto di HNO aki mester keda realisá i lo hasi todo por todo pa e pueblo no sali perhudiká.

Ta netamente e Minister aki dunando transparensia a pidi parlamentu pa bai di akuerdo ku intervenshon di SOAB i Algemene Rekenkamer pa wak e sifra pa sigura ku niun depchi lo keda malversa.

Mi ta lamenta ku enbes di sostené e lucha pa yega na klaridat rondo di fondonan di konstrushon di nos Hospital, Parlamentario Dos Santos ta hasi komosifuera ku Sra. Minister Camelia-Römer lo ta parti di plan pa kosta pais un total di 700 mion den konstrukshon di Hospital Nobo, tirando ku sifra i komparando un preis di kamber di un hotel ku kamber di un hospital, algu ku ta totalmente for di tur lógika.

Minsiter Camelia-Römer a palabrá ku Parlamentu ku regularmente lo e ta na Parlamentu pa splika desaroyonan rondó di e konstrukshon i traspaso di e proyekto. Pues sr. Dos Santos komo Parlamentario i representante di pueblo den parlamentu por hasi tur pregunta pa trese klaridat rondo di fondonan ku lo keda invertí pa konstrukshon di HNO. Minister Camelia-Römer lo ta den Parlamentu pa kontesta tur pregunta di miembronan di Parlamentu.

Partido PIN ta orguyoso di e bon trabou ku su Minister a bin ta hasi den e kartera di Salubridat, Medio Ambiente i Naturalesa i ta konsiente ku atakenan lo keda bin den su direkshon pa stroba e bon trabounan, pa asina desvia bista di pueblo for kosnan positivo ku e minister aki ta bezig kune. Partido PIN ta kondena e atake riba su Minsiter, Kòrsou por mihó.

Kenneth Pieter, number 10 riba lista di PIN

 

 

Advertisements
error: Content is protected !!
%d bloggers like this: