Advertisements

Ahedresistanan ku mihó dia

Ahedresistanan ku mihó dia

 

Apesar di a pèrdè tambe den e di dos buelta, e ahedresistanan di Kòrsou a logra gana sí nan promé puntonan den e Olimpiada di Ahedres na Batumi, Georgia. E tim maskulino asta a herá di tabla ku Nepal, pero a kai vensí ku diferensia di 1 punto: 2,5 – 1,5. E ekipo femenino a pèrdè kontra Hapón ku 3,5 – 0,5.

Kòrsou den e di dos buelta a kambiá e tim maskulino. E veterano Wim Blijstra a remplasá e hóben talento David Pietersz i a hunga tambe na e promé tablero. E kambio aki a nifiká ku Ursus van Bemmelen, Rurik Capella i Jimmy Izijk a skuif pa tablero 2, 3 i 4.

E kambio ku kapitan David Curiel a trese den e tim, a duna mesora su frutanan. Blijstra a gana su wega, miéntras ku Van Bemmelen a faya un movida ganadó pero despues a logra un tabla tòg.

Den su promé partido na Batumi, Blijstra a gana konvinsente di Himal Lama di Nepal. Ela hunga ku blanku e sistema ingles ku su kontrinkante no por a desifrá i a kai pèrdí i no a rekuperá mas.

Capella tambe a hunga ku blanku i a kuminsá bon kontra di Bibek Thing. E ahedresista di Kòrsou a ehekutá e apertura konosí komo atake Trompowsky. Pero na lugá di hunga trankil i asina amplia su ventaha den posishonal, ela skohe pa un atake ku un ofrenda dudoso. Su kontrinkante a logra para e atake aki i alabes salí ventahoso i forsá Capella entregá.

Izijk tabatin un kontrinkante fuerte den persona di Rijendra Rajbhandari, ku por sierto den promé buelta a gana dje gran maestro di Canada Aman Hambleton. Nan a hunga e apertura Catalanio kaminda ku Izijk a bin bou di preshon i kaminda su kontrinkante a tuma inisiativa i despues tambe a gana material pa sigurá su viktoria.

Van Bemmelen a hunga ayera e partido di mas largu dje tim maskulino. E tabatin pretu kontra di Madan Krishna Kayastha i a skohe pa e variante ‘Dragón’ dje apertura Siciliano, miéntras ku su oponente a bin ku e wega Maroczy.

E kombinashon di wega di tur dos ahedresista a pone ku e partido tabata skèrpi. Sinembargo Van Bemmelen a hasi un mal movida i resultá den un tambe mal posishon. Apesar di esaki ela logra kompliká su kontrinkante su wega te ku esaki a faya un movida ganadó i tur dos a drenta wega final pareu ku pues ta un tabla.

Kontrali na e tim maskulino, esun femenino tabatin menos suerte. Ailèn Mena só a logra un ‘remise’ (tabla) kontra e hapones Karen Hoshino. Na tablero 2 Mariana Sanchez a pèrdè kontra Azumi Sakai. Taqesyah Marcos na tablero 3 a rekonos’é ku Natsumi Kojima tabata mihó. Finalmente Arzy Zahia Salim-Moussa tambe a pèrdè kontra Misaki Shibata.

Advertisements

Skibi bo komentario / Opinion

This site uses Akismet to reduce spam. Learn how your comment data is processed.

%d bloggers like this: