Advertisements

PREPARASHON PA PROYEKTO NOS RAIS MUSIKAL TA DEN FULL SWING

PREPARASHON PA PROYEKTO NOS RAIS MUSIKAL TA DEN FULL SWING

WILLEMSTAD — Manera ya ta konosí, AMAK, Instituto pa Formashon Musikal I nan partnernan ta presentá un bankete musikal, djadumingu 7 di òktober den Curaçao Festival Center na okashon di selebrashon di 50 aña AMAK.

AMAK di e forma aki ke gradesí pueblo di Kòrsou, prensa i tur e spònsernan ku durante 50 aña sostené aktividatnan di AMAK i ta pe e motibu ei ta kobra un entrada simbóliko di 10 florin ku ta destiná pa formashon musikal grátis pa hóbennan den bario.

AMAK por a hasi e gesto aki danki na kolaborashon di tur e artistanan ku ta partisipá den e programa manera Típiko Pasa Bon, Arnell i Orkesta, Orkesta Vega, e front di Buleria i kantantenan manera Clinton Hato, Chemsz, Dibo Doran i e intérpretenan di e kansionnan di ántes ku ta Gibi Doran, Henry B,  Kenneth Hooi, Urvin Yano, Pastor Raul,  Melania van der Veen i e kantantenan hóben di Junior All Star.

E orkesta di Junior All Star bou di direkshon di Gedeon Chandler ta den full preparashon  i den fin di siman aki por mira algun di e piesanan ku a keda grabá durante un ensayo djasabra último den Curaçao Festival Center.

Ta bon pa menshoná aki ku AMAK kier invitá tur miembro ku tin nan karnèt bálido di e aña aki, pa nan asistí na e evento aki huntu ku nan pareha pa bin disfrutá di e bankete di variashon musikal, kaminda tin presentashon di hopi artista hóben i adulto.

Finalmente AMAK ta kontentu ku e ta kontribuí na konserva nos historia musikal i na final di e konsierto lo tin un grabashon ku lo keda entrega na instansianan ofisial di Gobièrnu.

Danki na e koperashon di  Radio MAS, Tele Curaçao, Prins Bernhard Fonds, ACU, UTS, Licores Maduro, The Trader, Multi Post, Coca Cola,  Massive Productions   i medionan di komunikashon, ku a kontribuí na realisashon di e proyekto Nos Rais Musikal.

Advertisements

Skibi bo komentario / Opinion

This site uses Akismet to reduce spam. Learn how your comment data is processed.

%d bloggers like this: