Advertisements

Planifikashon pa introdukshon di bakuna kontra kanser di boka di matris pa aña eskolar 2019- 2020   

Planifikashon pa introdukshon di bakuna kontra kanser di boka di matris pa aña eskolar 2019- 2020

Willemstad –  Kanser en general ta un grupo di malesa ku mortalidat ekstremadamente haltu. Mundialmente den mayoria pias ta malesanan kardio- i serebrevaskular so ta mas frekuente komo kousa di morto. Bou de e grupo di kanser, kanser di boka di matris ta un tipo di kanser ku parsialmente por wòrdu prevení, esta ora e kousa ta infekshon viral ku e vírus papiloma humano HPV (Human Papilloma Virus). E infekshon aki ta tuma lugá via kontakto seksual i  pues ta trata di un malesa venériko. Banda di kanser di boka di matris, infekshon ku e vírus por kousa tambe kanser i wrat di boka den boka, garganta i lenga.

Pa detektá kanser di boka di matris ya pa hopi aña ta uza e “screening” di boka di matris konosí komo ‘PAP’-test. Esaki pa detektá kambionan di boka di matris den un estado hopi tempran pa asina por aktua tempran den kaso di kambionan ku ta bayendo den direkshon di kanser i tambe tempran den kaso di kanser.

Resientemente tambe a bira posibel pa prevení kanser a konsekuensha di HPV dor di bakuná hóbennan ku un vakuna kontra HPV. Den práktika esaki a mustra efektivo i diferente pais a introdusié. Organisashon Mundial di Salú (WHO) i PAHO den su Komishon Regional pa e kontinente di Amérika di sèptèmber 2018, a kaba di aprobá un Plan di Akshon pa prevenshon i kombatimentu di kanser di boka di matris di 2018 pa 2030. E plan aki entre otro ta urgí pa duna prevenshon i kombatimentu di kanser di boka di matris prioridat i implementá programanan dirigí riba esaki, pa asina por redusí kanser di boka di matris konsiderablemente den e periodo entre aworakí i 2030.

Kòrsou ya pa algun tempu a bin ta hasi preparashonnan riba e área aki. A hasi investigashon sientífiko kaminda a proba ku na Kòrsou tambe kanser di boka di matris ta hopi frekuente i espesialmente tambe ta kua ta e tiponan di vírus mas frekuente aki na Kòrsou.

E preparashonnan ta di tal manera avansá ku lo introdusí e bakuna kontra HPV entrante e aña eskolar binidero, esta 2019- 2020. Pa hasi esaki mester adaptá e programa di bakunashon aktual i tambe hasi preparashon logístiko i di personal.
Manera ta e kaso ku otro bakunanan, esaki lo bai kompañá ku aserkamentu di

mayornan pa pèrmit pa esaki. Promé ku e introdukshon tuma lugá, lo tin tambe un kampaña amplio di informashon pa henter komunidat i pa tur profeshonal den kuido.

Ku introdukshon di e bakuna aki, Kòrsou ta sigui desaroyonan internashonal hopi di aserka i ta pone un paso importante mas dilanti riba tereno di prevenshon.

 

Advertisements

Skibi bo komentario / Opinion

This site uses Akismet to reduce spam. Learn how your comment data is processed.

%d bloggers like this: