Advertisements

Minister di Hustisia ta elogiá KPC i kadena hudisial pa e trabou duru na bienestar di komunidat

Minister di Hustisia ta elogiá KPC i kadena hudisial pa e trabou duru na bienestar di komunidat

Minister di Hustisia ta elogiá henter e kadena hudisial en general i Kuerpo Polisial Kòrsou en partikular ku resultadonan di e trabounan duru na bienestar di nos komunidat. Manera ta konosí, djárason 19 di sèptèmber último, Kuerpo Polisial di Kòrsou a presentá sifranan ofisial di krímennan di impakto haltu riba nos komunidat (e asina yamá ‘High Impact Crimes’) te ku luna di ougùstùs di aña 2018. Manera ta kustumber, a kompará e sifranan aki ku añanan anterior p’asina por analisá tendensianan di krímen na Kòrsou na un forma rashonal, profeshonal i ophetivo.

Asesinato, atrako i kiebro

Un análisis ophetivo ta mustra ku:
 kasonan di asesinato a baha ku 33% kompará ku e aña anterior;
 kasonan di atrako a baha ku 35% kompará ku e aña anterior;
 kasonan di ladronisia di outo a baha ku no mas ku 57% kompará ku e aña anterior;
 i kasonan di morto den tráfiko a baha ku 31% kompará ku e aña anterior.
Pa loke ta trata kiebro den kas, tabatin un bahada mínimo di 3.5% i e úniko forma di krímen ku a krese den 2018 ta kiebro den negoshi ku a subi ku 14% kompará ku e aña anterior esta, 25 kaso mas. Komo tal, sifranan ta mustra ku tin un bahada signifikante di krímen en general den nos pais.

Motibunan tras di e bahada

Un analisis inisial ta mustra ku e bahada aki tin di haber ku e eksperiensia ku Kuerpo Polisial a gana den e forma di trabou basá riba uso di informashon (e asina yama ‘Informatie gestuurd’) i e esfuerso kombiná huntu ku otro partnernan tantu paden i pafó di e kadena hudisial manera entre otro ku Interpol, Wardakosta, Duana, Kmar, Curmil i Defensie. E esfuersonan aki tin komo resultado ku Kuerponan por antisipá i evitá krímen mihó dor di tin presensia efektivo den areanan di riesgo i tambe nan por reakshoná mas efektivo riba kasonan ku sosodé.

Kriminalidat ta keda preokupante

Korto tempu despues ku e sifranan a bira konosí, a tuma lugá algun kaso lamentabel den nos komunidat. Minister di Hustisia ta hopi konsiente ku un sierto grado di krímen den un komunidat ta inevitabel, ya ku esaki ta mará na komportashon humano. Akontesimentunan manera esnan ku a tuma lugá den fin di siman tras di lomba sinembargo ta keda preokupante i ta impaktá nos komunidat i e sentido di seguridat profundamente. E insidentenan aki pa lamentabel ku nan por ta, sinembargo no mester kita nos foko for di e meta prinsipal, esta baha krímen den nos komunidat i alsa e sentido di seguridat general. Un análisis ophetivo ta mustra ku nos ta riba e kaminda korekto pa logra e metanan aki. Ademas e kadena Hudisial lo sigui traha dirigí pa atendé i solushoná e kasonan resien, entre otro dor di sigui ku e koperashon ekstenso entre partnernan den kadena hudisial i pafó. Komo tal, Minister di Hustisia ta gradisí i elogiá tur e partnernan aki pa nan dedikashon i esfuerso i ta animá nan pa sigui ku e bon trabou na bienestar di komunidat di Kòrsou, apesar ku no ta tur ora nan ta risibí e rekonosementu ku nan ta meresé.

Koperashon di komunidat

Kambio di e tendensia negativo di subida di kriminalidat, ta debí tambe na e bon koperashon ku e kadena hudisial ta risibí di nos komunidat. Komo tal, Minister ta gradisí tambe komunidat di Kòrsou pa e koperashon den solushonamentu di kasonan di krímen i alabes ta enkurashá pueblo pa sigui mèldu situashonnan inkorekto.

Prevenshon

Sinembargo nos no a yega ainda. E esfuersonan den represhon mester keda kompañá ku un empuhe enorme den esfuersonan preventivo, di forma ku por yega na kambionan di komportashon duradero den nos komunidat. Den e kuadro aki, di 4 pa 6 di òktober próksimo, Ministerio di Hustisia ta lansa su aña di prevenshon, kuminsando ku un simposio di prevenshon na WTC. E simposio aki ta un promé paso den un trayekto kaminda ‘prevenshon den i huntu ku komunidat’ lo ta sentral den e trabounan di Ministerio di Hustisia pa kontrarestá kriminalidat na Kòrsou.

Advertisements

Skibi bo komentario / Opinion

This site uses Akismet to reduce spam. Learn how your comment data is processed.

%d bloggers like this: