Advertisements
window.dataLayer = window.dataLayer || []; function gtag(){dataLayer.push(arguments);} gtag('js', new Date()); gtag('config', 'UA-83616463-1');

Ahedresistanan a pèrdè promé seri

Ahedresistanan a pèrdè promé seri

E ahedresistanan di Kòrsou a pèrdè ayera, djaluna 24 di sèptèmber 2018, nan promé seri di enkuentro na Olimpiada di Ahedres. Tantu e tim femenino komo maskulino kai vensí ku skor di 4-0 kontra respektivamente Peru i Uzbekistan.

Mas ku 180 país ta kompetí den Olimpiada di Ahedres ku e aña’ki ta tuma lugá na Batumi, Georgia. E evento dje deporte noble aki ta dura te 6 di oktober.

Den e promé buelta e tim maskulino di Kòrsou a topa e fuerte selekshon di Uzbekistan. Den e ekipo aki ta hunga e hóben di 14 aña Nodirbek Abdusattorov ku ta konsiderá un genio i un dje gran maestronan di mas hóben den historia di ahedres. Ela gana despues di un lucha tenas den partido ku apertura ingles di Ursus van Bemmelen di Kòrsou.

Na e di dos tablero Rurik Capella a hunga su apertura preferí ku ta e defensa Pirc i a logra sali bon for di esaki kontra e fuerte hungadó Nodirbek Yakubboev. Un kalkulo robes den wega medio sinembargo a pon’é kai atras i despues pèrdè e partido.

Jimmy Izijk a hunga un tremendo partido kontra di Nikita Khoroshev i sali ku bon posishon for dje variante skèrpi di defensa yamá ‘Konings-Indisch’. Kasi e yu di Kòrsou a registrá un remise, esta empate. Sinembargo bou di preshon di oloshi ela faya e mihó movida ku a indusí su derota na tablero 3.

Den su promé enkuentro riba plano mundial e talentoso ahedresista David Pietersz a demonstrá kalidat i nivel. Ela wanta bon kontra e dos biaha kampion di Uzbekistan, gran maestro Saidali Iuldachev. Esaki sinembargo a hasi uzo di su eksperensia vasto pa via di un kombinashon di atake gana dje yu di Kòrsou na tablero 4.

Meskos ku tim maskulino, esun femenino tambe a pèrdè ku skor di 4-0 kontra Peru. Ailèn Mena ku tabatin blanku n’e tablero number 1 a sufri un derota na man di Paula Elizabeth Paredes Bustamante. N’e di dos tablero Mariana Sanchez ku pretu tabatin ku rekonosé ku Flor De Maria Zarate Oyague tabata mihó. Arzy Zahia Salim-Moussa ku blanku tambe a pèrdè kontra Ann Chumpitaz. Finalmente Mitzy Mishell Caballero Quijano a superá Taqesyah Marcos (pretu).

Advertisements

Skibi bo komentario / Opinion

This site uses Akismet to reduce spam. Learn how your comment data is processed.

error: Content is protected !!
%d bloggers like this: