Advertisements

Prinses Wilhelmina Fonds ta lansa proyekto ‘Kada Granito Ta Konta’

Prinses Wilhelmina Fonds ta lansa proyekto ‘Kada Granito Ta Konta’

WILLEMSTAD – Djaluna mainta Stichting Prinsès Wilhelmina Fonds (PWF) a lansa su proyekto ‘Kada Granito Ta Konta’ na su sentro na Scharlooweg 52. Ku e proyekto aki e fundashon, ke duna mas atenshon i informashon tokante diferente tipo di kanser ku tin. Naturalmente un kampaña di informashon, no opstante koperashon ku e fundashon ta risibí di media i otro instansia, tin gastu mará na dje.
Ku e kampaña PWF ta hasi un yamada na komunidat pa pasa na sentro di e fundashon entre 10 or i 1 or pa hasi un kontribushon. Komo un gesto di gratitut pa e kontribushon e kontribuyente ta risibí un pieda riba kua klientenan di PWF a fèrf un sinta di koló. Riba e pieda tin alabes un sticker di PWF. E kontribuyente por skohe e koló ku ta simbolisá e tipo di kanser ku un ser kerí di dje a lucha òf ta luchando kuné. E ‘kick off’ di e kampaña ta e siman aki, pero naturalmente por sigui kontribuí ku un granito durante hinter aña.
Sr. Curd Evertsz, kende ta hasiendo diferente kaminata pa stimulá ku ta hasi un kontribushon na PWF pa medio di un ‘standing order’, e djaluna mainta tambe tabata presente. E klientenan a yena un ‘back pack’ di Curd ku un parti di e piedanan kual e ta karga durante su kaminata pa tira lus riba e peso ku pashèntnan di kanser i nan famia mester biba kuné.
Sra. Grace Goede, miembro di direktiva di Stichting Prinses Wilhelmina Fonds, a informá ku pa aworakí e piedanan ta optenibel na e sentro na Scharlooweg 52, pasobra nan ta deseá pa mas tantu hende posibel yega na e sentro pa asina sa mas di loke e fundashon ta hasi. Djabièrnè tin un Dia Habrí hinter dia na e sentro ku lo klousurá ku un Happy Hour den oranan di atardi.

Advertisements

Skibi bo komentario / Opinion

This site uses Akismet to reduce spam. Learn how your comment data is processed.

%d bloggers like this: