Advertisements

KOPA ABC TA INISIÁ, DJASABRA 15 DI SÈPTÈMBER PRÓKSIMO NA ARUBA, BONEIRU I KÒRSOU. JONG HOLLAND LO TOPA JUVENTUS DEN SDK PA 8:15 DI ANOCHI!

KOPA ABC TA INISIÁ, DJASABRA 15 DI SÈPTÈMBER PRÓKSIMO NA ARUBA, BONEIRU I KÒRSOU.

JONG HOLLAND LO TOPA JUVENTUS DEN SDK PA 8:15 DI ANOCHI!

 

Despues ku nos selekshon nashonal a hasi un tremendo papel durante e komienso di Nations League, awor ta toka turno pa nos ekiponan lokal sigui saka kara di Kòrsou.

Despues di algun aña ku kopa Antiano a kai afó, Aruba, Boneiru i Kòrsou a uni forsa pa introdusí Kopa ABC pa remplasá Kopa Antiano.

 

Meta di e kampionato aki ta pa e timnan di Aruba, Boneiru i Kòrsou kompetí ku otro p’asina oumentá e amistat i fraternidat entre e islanan aki i alabes midi e nivelnan di e ekiponan.

 

E ekiponan ku lo partisipá na e kampionato aki lo ta e ekipo kampion i supkampion di Aruba, Boneiru i Kòrsou. Den e siman tras di lomba a tuma lugá e sorteo pa e Kopa ABC na FFK i via ‘Skype’ Aruba ku Boneiru por a presensiá na unda e ekipo supkampion lo biaha.

 

E resultado tabata lo siguiente; e ekipo kampion di Aruba, Dakota, lo enfrentá Vesta, e ekipo supkampion di Kòrsou na Aruba. E kampion di Boneiru, Real Rincon, lo enfrentá e ekipo supkampion di Aruba, Nacional, na Boneiru. Miéntras na Kòrsou, Jong Holland, e ekipo kampion di Kòrsou lo topa e supkampion di Boneiru ku ta Juventus. E promé buèlta di Kopa ABC lo ta djasabra 15 di sèptèmber i ta tuma lugá mesun pareu na Aruba, Boneiru i Kòrsou.

 

Skema di Kopa ABC:

Fecha Orario Ekipo A Ekipo B Stadion
1 15-09-18 20:15 Dakota vs Vesta C.D. Guillermo Prospero Trinidad
2 15-09-18 20:15 Real Rincon vs Nacional Antonio Trenidad
3 15-09-18 20:15 Jong Holland vs Juventus Ergilio Hato
                     SEMI-FINAL
4 22-09-18 20:00 Ekipo nr. 1 vs Ekipo nr. 4 Lo anunsiá despues
5 22-09-18 20:00 Ekipo nr. 2 vs Ekipo nr. 3 Lo anunsiá despues
 

FINAL

6 29-09-18 20:00 Ganadó wega 4 vs Ganadó wega 5 Lo anunsiá despues

E ekiponan ganadó ku e ekipo mihó pèrdèdó ta sigui pa e di 2 fase di e kampionato. Den e semi-final e 2 ekiponan ganadó ta bai disputá e final dia 29 di sèptèmber próksimo.

Entrada pa e partido aki ta fl. 10,- pa adulto miéntras mucha di 6 te ku 12 aña i 60+ ta paga fl.5,-. Karchinan pa e partido aki ta optenibel djasabra promé ku wega for di 6’or di atardi na e lokètnan di SDK.

FFK ta invitá hinter e pueblo di Kòrsou pa bin na bòshi bin apoyá, Jong Holland, e ekipo kampion di Liga MCB Promé Divishon ku lo enfrentá Juventus durante e inisio di Kopa ABC!

Nos ta topa djasabra, 15 di sèptèmber den Stadion Ergilio Hato!

13 di sèptèmber 2018

Advertisements
%d bloggers like this: