Advertisements

Frakshon di MAN ta pidi pa limpia ROP i Domeinbeheer i si ta nesesario pone nan bou di kuratela.

Frakshon di MAN ta pidi pa limpia ROP i Domeinbeheer i si ta nesesario pone nan bou di kuratela.

Durante di reunion di komishon sentral di parlamento último pidi pa frakshon di MAN a trata e situashon rondó di Klein Kòrsou. Durante  e reunion a bini dilanti ku ROP a duna un asina yama “voorwaardelijke bouwvergunning”  pa konstrukshon riba Klein Kòrsou kaminda klaramente tur dokumento tabata i ta indiká  ku no mag konstruí riba e isla. Esaki ta un prueba mas kon inkonsekuente  i pa bisa na un manera suave inkoherente tantu e departamentonan Domeinbeheer komo ROP ta traha  pa loke ta pèrmit. Un pregunta klave ku a bin dilanti  ta unda a sali ku e sistema  di “voorwaardelijk bouwvergunning”  esta  konstruí tanten miéntras ta warda pèrmitnan nesesario. Si t’asina, dikon  no ta duna tur esnan ku ta wardando pèrmit pa años kaba  tambe un voorwaardelijke bouwvergunning pa nan konstruí sea nan kas nan negoshi òf otro proyektonan. Mas i mas esaki ta demostrá ku no tin un maneho koherente den tantu Domeinbeheer komo ROP.  E ta duna bo e sentimentu ku pa Michi si pa Meme no. Diferente parlamentario a urgi Minister señora  Zita Jesus- Leitu pa tuma paso mas lihé posibel pa sana e situashon den departamentonan aki. A papia hasta di pone nan bou di kuratela. Simbolikamente frakshon di MAN pa medio di Parlamentario sr Wimbert Hato a entrega e Minister un basora ku e petishon pa trese un limpiesa den e departamentonan aki. E basora  ta bisa e Minister  simbólikamente ku awor si a yega e ora  pa hasi algu den tantu Domeinbeheer komo ROP pa asina  kosnan por kana mas lihé i mas fásil. Na momentu ku bo no  por stens riba hende djafó pa bin invertí den bo pais bo mester krea posibilidatnan lokal pa desaroyá i no ta un sekreto públiko ku pa años tin reklamo tokante  entrega di pèrmit sea pa un tereno òf pa konstruí. Esaki ta un estorbo grandi pa tantu hendenan lokal komo invershonistanan ku ke invertí den nos pais. Si pèrmitnan kuminsá sali ta krea posibilidat ku mas hende por haña trabou por ehèmpel den konstrukshon. Domeinbeheer su personal mester di sosten pa por logra habri kaminda pa terenonan wòrdu parti mas rápido posibel. Hopi petishon tin pega den Domeinbeheer ku ta trese hopi iritashon i disgustu den komunidat. Domeinbeheer mester haña un struktura mas dinámiko pa duna un mihó servisio mas efektivo  na komunidat. MAN ta sostené trahadónan di Domeinbeheer pero kosnan por bira mas mihó na nos tur su benefisio.  A yega momentu pa pasa un basora den e departamentonan konserní.

Advertisements
%d bloggers like this: